Dem erwierdigen geistlichn herrn herrn Johannsn abbt zu Lambach unserm genadigen herrn enpietn ich Wolfganng Neisl in der Schaffwisn, ich Hanns zu Niderlab, Sigmund Aigner in der Schaffwisn, Taman daselbs, alle geswisstred, Jorign Aignner zu Niderlab salign kinder, ich Linhart Phennichmair, ich Linhart Holtzl, Ulrichn Pocanoder sun, nimb mich an fur Magdalena, Barbara meiner swester tachter, unnser willig dienst. Fuegn ewrn genadn zu wissn, das wier uns vertzeichen aller der erbschafft und gerechtikait, so wier gehabt haben an dem guet am Trawnlehn zu Niderlab, ist dinstper urbar guet des wierdigen gotzhaws zu Lambach gegen unserm vettern Thaman Trawnlechner und allen sein erben, darumb uns von im ein volligs genuegn geschehn ist. Genadiger herr pitten wier ewr genad diemuetiklichn, ir wellet dem bemeltn Trawnlechner, unserm vettern ain vertzeich brieff mit ewrm genaden insigl bestattn und verttign, geloben wier ewrn gnadn fur unns und unser erbn und dafur ich mich benantter Linhart Holtzl angenomen hab und fur ir erbn mit unsern trewn furpaser in ewr gnadn insigl und bestattung nichtz zu redn noch dawider zu thun in kainerlai weis, sunder das undertaniklichn umb ewr genad verdien, und schikhn ewrn gnadn des zu urkund den petbrieff versarigt mit des erbern Jorigen Mullechner, dietzeit ambtman aufgedruktn petschafft, und zu zeugnuss der sach hat der erber Jorig Aschl, purger zu Wells auch zesambt sein petschafft aufgedrukt, dew wier mit vleis darumb gepetn haben, doch in und irn erbn an schaden. Geben am mantag nach Judica in der vasstn anno etc. lxxxvi^mo

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 167, Nr. 3140