Ich Gorig Palltinger, briester Passawer bistumb und an der zeit vicari zw Offennhawsen beken fur mich, all mein erben und thuen kundt offennlich mit dem brieff allen, den er fur kumpt, alls ich von Thomon und Hannsen gebrueder, die Kapfshaimer recht und redlichen kaufft hab das guett zw Penewanng mit seiner zuegehorunng ze nagst bey der kirichen, das dann erbrecht und dinstpar ist dem erwirdigen goczhaus zw Lambach. Das ieczgemellt guett mit seiner zuegehorunng hat mir und mein erbenn der erwirdig und geistlich mein genadiger und lieber herr her Johanns abbt zw Lambach alls gruntther bestatt und verlichenn nach lautt brieff und sigl, so ich von sein genaden dar umb hab. Auf solichs hab ich obgenanter Gorig Palltinger an stat mein und aller meiner erbenn dem egenantten meinem genadigenn herren von Lambach mit meinen trewn gerett, gelobt und versprochen in krafft des brieffs, das ich und all mein erben von dem obgenantten guett mit seiner zuegehorung dem gemellten meinem genadigen herren von Lambach seiner genaden goczhaus und nachkomen damit trew und gehorsam und gewarttig sein sullen und wellen und alles das davon leyden und dullden als ander des bemellten goczhaus erbler und hindersassen von solhen iren dinstparing urbarguettern leydentt und dulldentt, und sullen auch kain wanndlung damit nicht haben an des bemellten meines genadigen herren von Lambach oder seiner genaden nachkomen hanntt, gunst und guetten willen auch iren dinst und herren vodrunng von dem gemellten guett alle jar jarlichen raichen und gebenn nach innhaltt, lautt und sag des gemellten goczhaws urbarpuech alles getreulich und ungevarlich. Zw urkund gib ich des allso den offenn brieff besigellten mit des edlln vessten Hannsen Zarttl an der czeitt hoffrichter zw Lambach, und des edlln Hannsen Leroch am Stadll baider aigenn anhanngunden innsigl, dew ich obgenanter Gorig Palltinger mit vleiss darumb gepetten hab, doch in und irenn erben an schadenn. Zeugen der gepedt umb dew innsigl sein die erbern Ulrich Leb an der Wiss, Pernnhartt Klennglbegk, burger zw Lambach, Thoman Mittermayr zw Penywanng und ander erberger lewtt mer. Der brief ist gebenn nach Cristi gepurd virtczehenn hundertt und im sechsundachczigistenn jarenn an pfincztag nach dem heyling Osterttag.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 168f, Nr. 3142