Erwurdiger in got genediger lieber herre mein dienst in allem guetwillen ewrn genaden bevor. Ewr genaden schreibm mir gethan mit seiner inhallt hab ich vernomen daneben ain copy, wie sich mein vatter saliger gegen ewrn genaden vodern loblicher gedachtnuss verschribm, pin ich ewrn genaden der pillichkait nye wider gewesnn, wie woll ich von ewrn genaden yetz neben andrn, so hinder ewrn genaden mer und myner haben uberladen und beschwartt war und muest ewrn genaden unwillen dapey erkenen, des ich nicht getraw und warlich umb ewr genad nicht verdient und mich des kunftiklich gerrn entladen will wan was ich pisher in dem handl so ewr genad und mein herrn gehabt gethan, verstet ewr genad, das ich des aus phlicht nicht uberhaben muegen und sover und vill ich noch mag und kan, sull mich ewr genad fur kainen widerwarttigen nicht erkenen, und wie ich der leishalbm ankern mag, will ich mich selb zu ewrn genaden kurtzlich fuegen und pit, ewr genad welle mein genediger herr sein und mich bevolhn haben will ich umb ewr genad alls meinen genedigen herren ob sich indert geburet gerrnn und willig verdien. Geben zw Wells an sambtztag nach sand Ambrosen tag anno etc. lxxxvito.

Cristof Preinhofer||
Statrichter zw Wells