Dem erwirdigen in Got und geystlichen herrenn hern Johanns, abbt zw Lambach, meinem genadigen herrenn, empewt ich Barbara Lienharten Huebmair weylennd zw nyder Enntern saligen tachter, meinn willig dinst wevor und fueg ewern genaden zu wissenn, das ich kawflich zw kauffen gebenn hab ains staten ewigen kaufs meinem lieben swager und muemen Simon Fuchgs zw Adming, Barbara seiner hawsfrawn und allen iren bayden erbenn und dreir jungen kind und das alt kind, der Michel, geleich miteinander erbenn ains so vil als das ander, all mein erbschaft und gerechtikayt, so ich gehabt hab in dem Mittern guet zw Adming, da sy ieczund hawslich auf siczent mit allem zwgehoren, nichcz awsgenomen, gelegen in Gebolczkircher pfarr in Starchenberger lanndgericht, und ist erb von ewren genaden und ewren goczhaws Lambach, dar umben in in drein von mein brief und sigl gesprochen ist wordenn. Hieinner genadiger herr pit ich euch mit diemuetigen fleys, ir wellet in mit ewrer genaden insigil aynen kaufbrief dar uber vertigen nach aller notturft, das ist mein gueter will, gunst und wissen hinfur an allew wider red und gelob auch bey meinem ayd und trewe jecz noch hinfur nychcz dawider zw reden, zw sprechenn noch zw vodern haben weder mit geistlichem noch weltlichem rechten, noch sunst an recht in kaynerlay weys angevar. Des zw urchundt sennd ich ewern genaden den offen pettbrief under des erbergen weysen Hanns Mullechner ewrer genaden ambtman aygen aufgedruckten pettschaft, den wir mit fleys dar umben gepeten haben, im und sein erben an schaden, dar under ich mich obgenante Barbara fur mich und all mein erben mit mein trewen an aydes stat verpind alles das war und stat zw halten inhalt des briefs. Zewgen der gepet umb das pettschaft sein dy erbergen Lienhart Schneyder zw Gebolczkirchenn, Symon Dietel zw Nyder enntarn, Lienhart Heller daselbs. Der brief ist gebenn an sand Veycztag nach Christi gepurd vierczechen hundert jar und darnach in dem sechs und achtzkistenn jar.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 174f, Nr. 3147