Ich Wolfganng Plachner in der nidernn Rewtt gesessenn, und ich Zeczili, sein hausfraw, bekennen fur uns und all unnser erben und thuen kundt offennlich mit dem brieff allen den er furkumpt, alls uns der erwirdig und geistlich unser genadiger und lieber herr herr Johanns, abbt zw Lambach, alls grunttherr zw freysacz und rechter freystifft lassenn hat die wisenn mit irer zuegehorung ze nagst an den Puechganng und des Barttl wisen alls die mit marick und zawnn umbfanngen ist, den wir dann selbs ausgestokcht habenn, in Lambacher pfarr gelegenn, allso gelobenn wir obgenantt Wolfganng Plachner und ich Zeczili, sein hausfraw fur uns und all unnser erbenn in krafft des brieffs mit unsern trewn an aidestatt, das wir die gemelt wisen mit irer zuegehorunng nicht anders in haben, nuczen und niessenn sullen noch wellen dann zw freysacz und rechter freystifft, die weill wir dann die gehabenn mugen mit gunst, willen und wissenn des genantten unnsers genadigen herren von Lambach, seiner genaden nachkomen und anwallden an irer statt und uns die von in nicht aufgesagtt wurdet, doch in solher beschaiden, das wir dem erwirdigenn goczhaus Lambach alle jar jarlichenn davon raichen und dienn sullen zw unnser liebm frawnntag der dinstzeitt zwen und dreissigk Wienner pfenning, und sullen in auch damit trew gehorsam und gewarttig sein, alls von solhem frey saczigem guett gepurd getreulich und ungevarlichenn. Zw urkundt geben wir des allso den offenn brieff besigellten mit des edllnn unnd vesstenn Hannsen Zartlein, an der zeitt hoffrichter zw Lambach aigen annhanngnnden innsigl, den ich obgenanter Wolfganng Plachner an statt mein und der genanten meiner hausfrau mit vleiss dar umb gepettenn haben, doch im und sein erbenn an schadenn, dar untter ich mich gemellter Plachner fur mich, mein hausfrawnn und all unnser erbenn mit unsernn trewnn an aidestatt verpindt alles war und statt ze hallten innhaltt des brieffs, der gebenn ist alls man zaltt nach Cristi gepurd vierczehenn hundertt und im sechsundachczigistenn jarenn an freyttag vor sannd Johannstag zwnn sunbenttenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 176f, Nr. 3148