Dem erwiridigen geistlichen herren herren Johanns abbt zu Lambach unnsseren genedigen gunstigen lieben herren enpewtten wir ich Jorig im Lehen in Gruenbaltaer pfarr, Anna, mein hausfraw, unnsser gehorsam undertenyg willig dinst wevor. Wir fuegen ewern gnadn zu wissen, das wir und all unnsser eriben und miteriben recht und redlich verkaufft und keyfflich zu kauffen und ubergeben haben unnsseren lieben swager Lienharten Mitter zu Nyderaycham Margreten seiner hausfrawen und iren payden leyberiben unnsser guet, genant das Mitterguet zu Pergaren und ewern genaden und des goczhaus zu Lambach dinstpar guett ist, pitt wir ewer genad mit allen undertenyng vleyss, es well ewer genad dem obgenanten Lienharten Mitter, Margreten seiner hausfraw und iren payden leyberiben ain gewondlichen kauff und ubergab prieff mit ewern genaden und des goczhaus zu Lambach insigell zu verferding. So ewer genad das gethan hat, so gelob ich obgenanter Jorig am Lechen, Anna mein hawsfraw und all unnsser eriben und mit eriben an ewer genaden und des goczhaus zu Lambach insigell nichts zu reden, sunder das altczeyt mit allen undertenynigen vleyss umb ewer genad verdienn und senden ewern genaden des zu urkund die offen pettczedel verpetschafft mit der erberen Hannsen Smid zu Pergaren und Hannssen Mitter daselbs payder aufgedruckten pettschafft, dew wir mit vleyss darumben gepetten haben, doch in und iren eriben und petschafft an schaden, under die petschafft wir unnsser und all unnsser eriben und miteriben verpinten mit unnssern drewen an aydes stat alles war und stet zu halten, das an dem prieff geschriben stet. Zeugen sind die erberen Hanns Smid zu Pergaren und Hanns Mitter daselbs. Der prieff ist geben an unnsser frawn tag do man zalt von Kristy gepurd taussent vierhundert und im syben und achczigisten jar.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 201f, Nr. 3170