Dem erwirdigen und geistlichenn herren hern Johannsen abbt zw Lambach, unnserm genadigenn und liebm herrenn embieten wir Wolfganng zw Leitten gesessen, Anna sein hausfraw, Thoman ze Grabollczhaim, Kathrey sein hawsfraw und Liennhartt, der genanten Wolfganngen und Thoman brueder, Thoman Reyttinger, Barbara sein hausfraw, Thoman zw Kyenn, Ursula sein hausfraw, und Breyd, Ulrichen weylentt zw Leytten saling tochter, unnser unttertanig, gehorsam dinst mit guettem willen zw vor und fuegen ewrn gnaden zw wissen, das wir unnserm liebm swagern Liennhartten, Ellspetten seiner hausfrawnn und allen irenn baiden erbenn recht und redlichn verkaufft habenn ainen vierttaill, so wir gehabt haben in dem guett mit seiner zuegehorunng, genant das Kramer guett ze Wiellding in Gebollczkircher pfarr gelegenn, das dann ewrn gnad und ewrn gnaden goczhaus urbar und dinstparigs guett ist. Hier auf bitten wir ewr gnad mit allem diemuettigem vleiss alls unnsern genadigen liebm herren, wellett dem genantten unserm swagern Liennhartten, Ellspetten seiner hausfrawnn und allen iren baiden erbenn ainen gewonndlichen kauff brieff nach gewonnhaitt und form ewrn genaden goczhaus umb den gemellten viertaill in dem bestimbten guett mit ewrn gnaden innsigl verfertigenn und bestattenn. So das beschehenn ist, globen wir ewrnn gnaden hiemit in krafft des brieffs mit unnsernn trewnn an aidestatt furpaser in ewrn gnadn brieff, sigll und bestattung nicht zw reden noch da wider ze thuenn in kainerlai weiss getreulichenn und ungevarlichenn. Und geben des allso zw warem urkundt ewrn gnaden die offenn pettzettl mit der erbernn Kollmann Altenhofer ewrn gnadn ambtman zw Gaspaczhofenn aigenn zw rugk aufgedrukchtn pettschafft, den wir obgenantt erbenn all mit vleiss dar umb gepetten haben, doch im und seinn erben an schaden. Zeugen der gepett umb das innsigll und petschafft sein die erbernn Vecz Haider, Thomon Mullperger und Liennhartt Schneider zw Gebollczkirchen. Geschehenn an pfincztag vor sannd Kathrein tag anno domini im achtundachczigisten jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 235-237, Nr. 3194