Friderich von gotts gnaden romischer kaiser etc.

Getrewr. Als wir dir vormals geschriben und bevolhen haben, dem ersamen geistlichen unnsern lieben andechtigen n. dem abbt und convenntt zu Lambach zwen und dreissigk dreyling und Hannsen Leroch zehen dreyling weins aufslagfrey furn ze lassen nach lautt unnser brief darumb ausganngen, haben unns dieselbenn klosterlewt anbracht, wie du in an derselben irer antzal nicht mer dann sechs dreyling habst furen lassen, des sy sich beswert bedunkchn, emphelhen wir dir ernnstlich und wellenn, das du den bemellten klosterlewten die ubermass der bestimbten irer antzal, auch dem Leroch obbenanntt dieselben zehen dreyling weins auf die berurtten unser brief noch aufslagfrey und on all annder irrung und hynndernuss furn lassest und sy damit nicht lennger aufhalltest, daran tust du unser ernstliche maynung. Geben zu Colln an mittichen nach sannd Symon und sannd Judas tag anno domini etc. lxxxviii unnsers kaisertumbs im sibenunddreissigisten jare.