Friderich von gotts gnaden romischer kaiser etc.

Ersamer geistlicher lieber andechtiger. Uns hat unser getrewr Wolfganng Hewpacher anbringen lassen, wie du im zugesagt im die viertzehen pfunndt pfening, so im weylennt Wolfganng Fleischakher zu Lambach schuldig worden sey, auf das du dich ettwevil seiner gelassen habe und gut underwunden habst zu geben und ausczurichten, das aber bisher nicht beschehen sey noch der uber meniger sein anlanngen und ervordern deshalben an dich tan von dir bekomen muge, des er zu schaden kome und sich des beswert bedunkht, empfelhen wir dir ernnstlich und wellen, daz du den benannten Hewpacher der berurten viertzehen pfunndt pfening furderlich entrichtest, betzallest, und darumb benugig machest, damit er deshalben in weitter kosstung nicht gefurtt noch wir mer angelanngt werden, daran tust du unser ernstlich maynung. Geben zu Ynsprugg an montag nach dem heiligen palm tag anno domini etc. lxxxviiii^o, unnsers kaisertumbs im acht und dreissigisten jare.