Dem erwirdigenn und geistlichenn meinem genadigenn und liebm herren herren Johannsen, abbt zw Lambach embeutt ich Liennhartt ze Hedollting auf dem obern guett gesessen mein unttertanig dinst mit guetten willen zuvor und fueg ewr gnad zw wissenm, das ich meiner liebm elichen hausfrau Margretten recht und redlichen abtretten und ubergeben hab all mein erbliche gerechtigkaitt, so ich hab an dem guett ze Hodollting ir lebtag unvertandlichenn hab, gewing oder hinder mein lass, das sy nach meinem abganng und tod damit hanndeln, thuen und lassen mag nach allem irem willen und gefallen. Auf soliche pitt ich ewr gnad mit diemuettigem vleiss alls mein genadigenn herrn, wellett der genantten meiner hausfrawnn umb die gemellt mein erbschafft und gerechtigtait in dem bestimbten guett mit seiner zuegehorunng ir lebtag ze nuczen und mit sampt die varundt hab verferttigen und bestatten, so das beschehenn ist, glob ich ewr gnad hiemit in krafft des brieffs mit meinen trewen an aidestat furpaser in ewr gnaden verferttigunng brieff und sigll nicht zw reden noch da wider ze thuen in kainerlay weis getreulichenn und ungeverlichen. Zw urkundt gib ich ewr gnaden des allso die offenn pettzettl pewartt mit des erbernn Kollman Alltenhofer, ambtman ze Gaspaczhofenm aigen zwrugk aufgedrukchtenn pettschafft, den ich obgenantter Liennhartt mit vleiss dar umb gepettenn hab, doch im und sein erbenn an schaden. Zeugenn der gepett umb das innsigll und pettschafft sein die erbernn Ulrich Schneider von Affnung, Mertt Stegmayr ze Kirichdorff und Wolfganng Rueprechtsrewtter. Geschehen an sambcztag vor sand Jorigen tag anno domini etc. im newnnundachczigistenn jaren.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 264f, Nr. 3218