Dem erwirdigen und geistlichenn herren hern Johannsen abbt zw Lambach meinem genadigen und liebm herren embeutt ich Konncz Hofinger, burger zw Wolfsperg im Lafenntall, mein unttertanig gehorsam dinst mit guettem willen zuvor und fueg ewrn gnad zw wissen, das ich recht und redlichen verkaufft hab meinen liebem bruedern und swagrin Liennhartten, Barbara seiner hausfrawn, Wolfganngen von Hofing, Margretten seiner hausfrawnn, Jorigenn ze Marschalhing, seiner hausfrawnn Margretten und ir aller erben all mein erbschafft und gerechtigkait, so ich ungevarlichen gehabt hab an dem guett mit seiner zuegehorunng auf der Leyten ze Marschalhing gelegen in Gaspaczhofer pfarr, das dann ewr gnaden goczhaus urbar und dinstparigs guett ist. Hierauff bitt ich ewr gnad mit sunderm diemuettigem vleiss, wellet den vorgenantten meinen bruedern iren hausfrawnn und allen iren erben ainen genuegsamen kauff brieff nach gewonnhaitt ewrn gnadn goczhaus verferttigen und bestatten, will ich zw sampt der pillichkaitt umb ewr gnad verdienn, und so das beschehen ist glob ich ewrn gnaden hiemit in krafft des brieffs fur mich und all mein erbn mit meinen trewen an aidestatt furpaser in ewrn gnaden brieff und sigll nicht zw reden noch dawider ze thuenn in kainerlai weiss getreulichen und ungevarlichen. Zw urkund gib ich ewrn gnadn des allso den offenn pettbrieff, versorigtt mit des erbernn Kollman Alltenhofer ewrn gnaden ambtman zw Gaspaczhofenn aigen zw rugk aufgedrukchten pettschafft, den ich obgenanter Konncz mit vleiss dar umb gebetten hab, doch im und sein erbn an schadenn. Zeugen der gepett umb das innsigll und pettschaft sein die erbernn Wolfganng Rienner zw Armynng, Niclass Pullinger, Mertt Erlinger und Liennhartt Schneider zw Gebollczkirchen. Geschehenn an pfincztag nach sand Jorigenn tag anno domini im newnundachczigistenn jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 267f, Nr. 3220