Dem erwirdign in Got herrenn hern Johannsn abbte zu Lambach unserm gnedign herrnn embietn ich Peter Stapfner burger zu Gmunden und ich Margret sein hawsfraw unnser willig diennst bevor. Fuegn ewrn gnadn zu wissen, das wir unser halbs jeuch akher um Trawnfeld zwischen der Schekerin und Liennhartn Hueter auf der Lewtn akher gelegen, das dan ewrn gnaden und dem wirdign gotshaws zu Lambach diennstper ist, dem erbern Taman Vischer burger zu Lambach, Brigiden seiner hawsfrawen verkauft haben. Bitten ewr gnad in allem vleis, ewr gnad welle in baiden und iren baiden erbn ain gwondlichen kaufbrief darumben und daruber besiglnn und vertigen. Das bescheen globen wir ewren gnaden und allen ewren gnaden nachkomen in ewren gnaden innsigl und vertigung nicht zu redn, hanndln noch tun, sonnder wellen ewr gnad und das gotshaws darinnen on schaden haltnn. Des zu urkunt gebn wir ewren gnaden disen betbrief, bewartn mit meines egenanten Petren Stapfner hieaufgedrugktnn betschade. Und umb unser baider kannleut vleissige bete willen mit des erbern Cristan Hehnperger, statschreiber zu Gmunden auch hieaufgedrugkhtnn betschade, um und allen seinen erben on schaden. Geben sambstags sand Sigmundts tag anno etc. octogesimonono.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 268f, Nr. 3221