Dem erwirdign in Got herrnn herrn Johannsn abbte zu Lambach, unserm gnedign herrnn, enbietn ich Ursula, Wolfganngn Kranibitmair weilent zu Lakirchn gesessen seling witib, ich Andre Mair am Hof anstat Wolfganng meiner vordern hausfrawen Margretn benants Kranibitmair tochter seling und mein eelicher sun dafuer ich mich nach der unvogtper ist gwalts annym, und ich Wolfganng Mair, burger zu Swanns an stat Matheus und Ursulan, geswistredn, meiner vordern hawsfrawen Elspetn, auch des Kranibitmair tochter und mein eeliche kinder, dafur ich mich auch gwalts angenomen hab, unser diennst in guetm willn bevor, fuegn ewrn gnaden zu wissen, das wir alle und jegliche unser gerechtigkaitn, so wir an dem halbn guet genant die Huttn alln sein zuegehorungn in Kirchaimer pfarr gelegen gehabt, das ewrn gnaden diennstper ist, dem beschaidn Benedictn zu Rochnstorf, Margretn seiner hawsfrawen verkawfft und zu kauffn geben habm, bittn ewr gnaden unserrm gnedign hernn welle bestimbtn Benedictn seiner hawsfrawen Margretn und allen iren bedn erben ain gwondlichn lanndlewffign kaufbrief umb die vermeltn halbn Hutten vertign und besiglnn. So ewr gnaden das getan hat, globn wir ewrn gnaden und allen ewrn gnaden nachkomen fur uns, auch des wir uns gwalts annemen und fur all unser erbn in ewr gnaden insigl nicht zu redn, hanndln noch tun, sunnder welln ewr gnad und das erwirdig gotshaws zu Lambach der vertigung halbn an allen schadn haltnn. Des zu urkhund geben wir ewrn gnaden disn betbrief besigltnn umb unser vleissiger bete willn mit des ersamen weisn Hannsnn Sauber ambtman zu Lakirchn hie aufgedrugktenn innsigl, im und allen seinen erbm an schadn, darunder wir uns auch dafur wir uns oben gwalts annemen und fur all unser und ir erben mit unsernn trewn und aiden verpinten inhalt des briefs, war und stet zu haltenn. Zeugn der gebet umb die innsigl seinn die erbern weisn Liennhart Mairhofer, burger zu Shwans, Lienhart Pierlmulner und Taman Aigner in Trawndorf. Geben an eritag nach sand Sophie tag der heilign junkhfrawen anno etc. lxxxviiii.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 272f, Nr. 3223