Wir Johanns von gots gnadn abbt zu Lambach bekennen mit dem brief, daz fur unns komen sein Augustin Toppler und Matheus Lanfelder, ped burger zu Wells und von wegen Martha, des yetzbenannten Lafelders hausfrawen, Barbara Pranpekhin weylend daselbs gesessen seligen tochter, und gaben unns zu erkennen, wie derselben Martha von der genannten irer muter seligen daz obergut zu Windpassing bei dem Gatern und das Hayderlehen geleich halbs auch daselbs bayde erbrecht von unns und unnserm gotzhaws und der bemellten Pranpekhin von Hannsen Pranpekhen weylend burger zu Wells irem hauswirt seligen gemacht und gegeben, des wir alles mit brief und sigl von unns zu bestattung darumben ausganngen erweisst sein. Darauf pat unns der obgenant Augustin Toppler auf pet und bevelh der obgenannten Martha mit diemutigm vleis, daz wir daz bestymbt obergut zu Windpassing und daz halb Hayderlehen daselbs mit iren zugehorungen dem genannten Matheus Lanfelder alls lehentrager anstat und von wegen der oftgenannten Martha seiner hawsfrawen und irer erben genedigklichen geruchten zu bestatten und zu verleihen, daz wir dann allso hiemit wissenlich in kraft des briefs getan haben, was wir in rechtlichen daran bestatten und verleihen sollen oder mugen, doch daz man unns und unnserm gotzhaws alle jar jarlichen davon raichen und dienn soll von dem bemellten Oberngut zu unnser lieben frawentag zu der dinstzeit sechtzigkh wienner phenning und von dem berurtten halben Hayderlehen zu dem bemellten unnser frawentag viertzigkh wienner phenning und zwai huener, zu sannd michelstag funf wienner phenning zu weinfur, zu dem prehentag funftzehen wienner phenning zu pawstewr, zu sand Jorgen tag funf wienner phenning zu vogtstewr. Wir offnen auch, daz sy kainerlay wanndlung damit nit haben sollen in kaynerlai weis on unnser hanndt und gutten willen und sollen unns auch alles daz davon leyden und dulden mit stewr, robatt und annder vodrung alls annder unnsers gotzhaus erbler und hynndersassen gen unns leydn und duldent unvertzigen unnsers gotzhaws rechten in allen sachen. Zu urkund geben wir in des allso den offenn brief besiglten mit unnserm anhanngunden insigl, der geben ist alls man zallt nach Cristi gepurd viertzehenhundert und im ainsundmewntzigisten jaren an freytag nach sanndt Matheus tag des heyligen zwelfbotten und ewangelisten.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 319-321, Nr. 3263