Dem erwirdigen in Got und geistlichen herrn herr Johannsen abbte zu Lambach unnserm genadigen liebn herrn empewt ich Lienhartt des Thoman von Hohenperg saligen elicher sun, ich Ursula sein hawsfraw und ich Anna, des Lorentzen zu Perndorff saligen gelassne witib unnser gehorsam willig dinst bevor. Wir fuegen ewren genaden alle ainhelligklich zu wissen, das wir all unnser erbschaft und gerechtikait, so wir ungeverlich gehabtt habm an der hueb zu Portzlewtten und an dem Pirnsteig daselbs mit aller rechtlichen zugehorung in Kalhaimer pfarr gelegen in Edlinger lanndtgericht und ist urbar und dinstpar euch und ewrer gnaden gotshawss, zu statem ewigen kawf verkawft habm unnsern lieben vettern und swagern Thoman Portzlewttner, der yetzund hewslich darauff sitzt, Margrethen, seiner elichen hawsfrawn und iren baiden erbm, dy sy habm oder noch gewingen, Lienhartt Habermayr zu Portzlewtten, Anna, seiner hawsfrawn und iren baiden erbm, dy sy habm oder noch gewingen, Wilhalm zu Mertzendorff, Margrethe seiner hawsfrawn und iren baiden leiberben, dy sy haben oder noch gewingen, Hansen zu Perndorff, Margrethen, seiner hawsfrawn und iren baiden erbm, dy sy haben oder noch gewingen, und Jorgen, Mertan und Wolfganngen geprueder des Thoman Portzlewttner. Darauf bitten wir ewr gnad mit allem sunderm vleis, welle denselben unnsern vettern und swagern ain genuegsamen lanndtlewffigen kawffbrieff daruber verfertigen, und wan ewr gnad das also gethan hatt, so geloben wir all ainhelligklich ewrenn genaden fur unns und all unnser erbm in ewr verfertigung und in sigll nicht zu reden wenig noch vill, sunder mit unnsern gar willigen dinsten umb ewr gnad verdien. Und des zu warer urkundt schicken wir euch den offenbettbrieff verfertigt durch unnser vleissigen gepet willen mit des erbern Wolfganng Hainpucher an den zeiten ewrer genaden ambtman aufgedruckten petschadt, doch im, sein erbm an schaden, under das petschadt wir unns all obgemelt fur unns und all unnser erbm verpintten bei unnseren trewen an aides statt alles das war und stett zu halltn inhallt des bettbriefs. Zewgen bittens umb ewr gnaden insigll an den kawfbrieff und umb das petschadt sind di erbern Jorg Vaschang, schulmaister zu Gaspoltzhoven, Sigmund wirt zu Affnang, Hanns Stegmair zu Kirchdorff und meniger genueg. Gescheen an phintztag vor sannd Mathias tag des heiling tzwelifpoten nach Christi unnsers lieben herren geburde viertzenhenhunndert und darnach der mynderen tzall in dem tzwaiunndnewnntzigisten jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 337f, Nr. 3276