Ich Lorencz Pawngartner zu Enczestorf bey Prunn bekenn, das ich des erwirdigen herrn herrn Johannsen, abbt zu Lambach weinczurl vorden bin und sein wirdikait mich darczu in seinen hof daselbs zu Ennczestorf aufgenomen hat in maynung wie hernach begriffen ist.

Item von erst sol und wil ich all sein weingerten daselbs in phlicht und bephelh haben und im die trewlichen pawn. Item von erst den Phaffen, item den Kaufweingart, item den undern Hawboltz, item den obern Hawboltz, item den Gappler.

Item zu dem andern sol er mir geben auf dy bemelten weingarten zu dem gemainen paw alle jahr zwayundvirtzig phunt phening.

Item dem dritten sol sein wirdikait ander nottdurfft zu sein weingerten ausrichten und zallen, das ist das gruebm in dy weingarten, dy grabm zu rawmen, er sol auch dy stekchen kauffen und das fuerlon, spiczen und eintragen sol er auch zallen. Er sol auch die schawb zu dem pannt kauffen und zallen.

Item dem vierden was ich benanter Pawngartner zu dem gruebm in sein weingarten kheyl hawn kauff und bedorff, dy sol der benant mein herr der abbt auch zallen.

Item zu dem funften sol sein wirdikait das holcz zallen und kauffen, was man des in dem lesen in dy ofen oder zu dem kochen bedorff.

Item zu dem sechsten sol er mir zu ainer pessrung geben alle jar zehen kueffel salcz und das erst jar zwo ruphen stukch tuch den hawern zu strosekchen und leylachen, und darnach alle jar ain ruphen stukch tuch etc.

Item zu dem sybenten sol er mir ain anlehen tun mit vi tal. den. und sol mir derselben so lang peiten als lang ich sein weinczurl bin. So ich aber nicht lennger sein weinczurl wolt sein oder im darczu lennger nicht fuegen und gevallen wolt, dann so sol ich in derselben vi tal. den. anvercziehen und an all ausczug beczallen und sol und wil im hinwider zu ainer sicherhait geben ain schuldzedel under der erbern und weisen Hannsen Truenten, burger zu Wienn und Jorgen Hotschier zu Prunn baider aufgedrukten petschadt etc.

Item zu dem achten sol yeder tail gegen dem andern nemen ain spanczedel in gleicher lautt, auch verpetschad mit der vorgenanten Hannsen Truenten und Jorgen Hotschier zu Prunn furdegrukten petschad in und irn erben an schaden. Beschehen zu Wienn an dem achtten tag unser lieben frawn schiedung anno domini etc. nonagesimo secundo.