Albertus, dei et apostolice sedis gracia episcopus Salonensis, reverendissimi in Christo patris et domini domini Cristoffori eadem gracia episcopi Pataviensis in pontificalibus cooperator, universis et singulis christifidelibus deum devoto et sincero corde colentibus, ad quos presentes littere nostre pervenerunt, salutem et sinceram in domino caritatem. Quoniam, ut ait apostolus, omnes stabimus ante tribunal Christi recepturi prout in corpore gessimus sive bonum sive malum, oportet ergo nos diem messionis extreme misericordie operibus prevenire ac internorum intuitu seminare in terris, quod reddente domino cum multiplicato fructu recolligere debeamus in celis firmam spem fiduciamque rectam tenentes, quoniam qui parce seminat parce et metet, et qui seminat in benediccionibus de benediccionibus et metet vitam eternam. Cum igitur ad sustentacionem ecclesie filialis sanctorum Nicolai et Blasi am Stadl, que iure parochiali spectat and monasterium Lambacense Pataviensis diocesis, proprie non suppetant facultates universitatem vestram, monemus et hortamur in domino atque in remissionem vobis iniungimus peccatorum, quatenus de bonis a deo vobis collatis dicte ecclesie pias elemosinas et grata ei subsidia erogetis, ut per subvencionem vestram ipsius inspirante consolatur, ut vos per hec bona et alia que domino inspirante feceritis ad eterna possitis gaudia pervenire. Cupientes igitur ut ecclesia predicta cum altaribus eiusdem congruis frequentetur honoribus ac utriusque sexus christifideles eo libencius devocionis causa confluant ad eandem quo ibidem celestis dono gracie uberius sese conspexerint esse refectos, nos de omnipotentis Dei misericordia ac beatorum Petri et Pauli apostolorum eius auctoritate confisi omnibus et singulis vere penitentibus et confessis, qui dictam ecclesiam et altaria eiusdem in nattivitatis, resurreccionis et ascensionis domini nostri Ihesu Christi et penthecostes ac singulis gloriose virginis Marie, omnium sanctorum, corporis Christi atque in invencione sancti Stephani prothomartiris, in invencione exaltacioneque sancte crucis necnon ipsius ecclesie patrociniorum videlicet Nicolai et Blasii et dedicaccionis festivitatibus devote visitaverint et ad reparacionem, conservacionem, municionem, augmentacionem eiusdem necnon calicum librorum et aliorum ornamentorum pro divino cultu inibi necessariorum manus suas prompcius porrexerint adiutrices, de quolibet festorum predictorum quadraginta dies criminalium, et octoginta venialium peccatorum de iniunctis eis penitenciis misericorditer in domino relaxamus futuris perpetuis temporibus duraturis. In quorum fidem et testimonium presentes literas fieri nostrique sigilli pontificalis iussimus et fecimus appensione communiri. Datum et actum in monasterio Lambacensi anno domini millesimo quadringetesimo nonagesimo secundo tercia mensis octobris.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 352f, Nr. 3289