Erwirdiger in Got geistlicher und besonnderlieber herre, mein willig dinst sein euch zuvor. Unsers allergenedigisten herren n des romischen konig etc. ambtman Wolfganng Scherrer zu Helkhing in der vogtey Wels meiner verwesung ghorig, hat mich anstat seiner koniglichen gnaden anbracht, wie im ewer hinderses Kuentz zu Velding innehalt ains spruchs, so bey penfalln beschechen sey und er euch aigntlich brichten wirdet, v ß. den. schuldig sey, der er von im bisher auf menig sein ervodern nit bekomen hab mugen und im darzw benanter Kuentz an gestern mit gewerter hannt furgehalden, im leib schaden zu ziehen wellen, und benanter ambtman vor im nit sicher sey. Weil dann sollichs unbeklagt und wider recht gehanndlt, beger ich von der koniglichen mayestat etc. und bit euch von meinen wegen, ir wellet bey bemeltem ewrem hindersessen Kuentzen darob sein und sovil verfuegen, das benanter ambtman obemelter v ß. den. bezalt und vor ytzbenantem Kuentzen versichert werde, als ir selbs verstet, pillich ist, vermaint dann bemelter Kuentz beruerten ambtman spruch nit zu vertragn, bin ich auf anlanngen willig von im ze tuen, was recht und billich ist, bit deshalb ewer verschribn antburt. Datum Wels montags vor sandt Erasn tag anno etc. lxxxxiiii.

Michel Oberhaimer||
vogt zu Wels