Dem erwirdigen in Got geistlichen herrn, herrn Johannsen abt zu Lambach, unnserm genedigen und lieben herrn, empewten wir ich Dorothe, Wolfgangen zu Leytten gesessen hawsfraw und ich Barbara Sigmunden zu Reichling hawsfraw unnser gutwillig dinst bevor und fugen ewren genaden ze wissen, daz wir recht und redlich verkawft und ze kawffen geben haben unnserm lieben vettern und bruder Steffan, Ulrichen Kaser seligen sun am Hewfeld gesessen, Margrethen seiner hawsfrawn und iren paiden erben all unnser erbschaft und gerechtikait an und auf dem sechs tail aus dem gut genant in der Schrottaw und aller seiner zugehorung, darauf dann der benant Ulrich Kaser seliger gesessen und sonnderlich ausgemarcht ist erbrecht von ewer genaden gotshaws umb ain gellt, des wir gantz und gar ausgericht und betzallt worden sein zu rechten tagen an allen schaden. Darauf bitten wir mit diemutigem vleis, ewr genad welle dem benanten Steffan unnserm lieben vetter und bruder, Margrethen seiner hawsfraw und iren paiden erben umb solh unnser erbschaft und gerechtikait ain genugsamen kawfbrief mit ewer genaden insigl verfertigt geben. Und so ewr genad daz allso gethan hat, geloben wir ewrn genaden fur unns und all unnser erben in kraft des petbriefs in sollich ewr genaden brief und sigl nit ze reden noch dawider ze thun in kainer weis ongevar, sonnder umb ewr genad alltzeit willig ze verdienen stat halltund nach lawt desselben kawfbriefs. Mit urkund des petbriefs bewart mit der erwern Petern Zagl ambtman zu Albmeckh und Hannsen zu Haytzing baider aufgedruckhten petschaden, dy wir vlleissig darumb gebeten haben in und irn erben on schaden, des sein zewgen Lienhart Kranwitmullner und Thaman zu Reichling. Geben an sannd Blasen tag anno domini etc. im funfundnewntzigisten.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 452f, Nr. 3373