Dem erwirdigen in Got geistlichen, meinem genedigen und lieben hern, herren Johannsen abbt zu Lambach, empewt ich Anndre Machswol, burger zu Eferding, mein unnttertanig willig dinst bevor und fug ewren genaden ze wissen, daz ich recht und redlich verkawft und ze kawffen geben hab Hannsen Hohenperger, Elena seiner hawsfrawen und iren paiden erben meinen zehent allen uber und uber auf der Huben am Hohenperg und irer rechtlichen zugehorung und ist derselb zehent mein vaterlich erb und freys ledigs aygen und daz gut darauf er ist erbrecht von ewer genaden gotshaws, und hab in den selben zehent gegeben umb ainn summa gellts, der ich von in gantz und gar ausgericht und betzalt worden bin zu rechten tagen on allen schaden. Bitt ich ewer genad mit diemutigen vleis, wellet demselben Hohenperger, seiner hawsfrawn und irn paiden erben uber solhen zehent ainen genugsamen kawfbrief von mir lawttend mit ewren genaden anhangunden insigl verfertigt geben. Das beschehen, gelob ich ewren genaden hiemit in kraft des briefs in solh ewer genaden brief und sigl nichts ze reden noch dawider ze thun in kainerlay weis, sonnder umb ewer genad mit willigen dinsten alltzeit gern ze verdienen und stat ze hallten, so derselb kawfbrief ausweiszt. Mit urkund des bettbriefs, den ich ewren genaden darumben sennd unntter der erbern weisen Valltan Maler und Wolfgangen Stoberl baider burger zu Eferding zusambt meinem aygen aufgedruckhten petschaden bewart, dy ich mit vleis darumb gebeten hab in und iren erben on schaden, darunter ich mich und all mein erben mit meinen trewen aides weis verbind statt ze hallten innhallt desselben kawfbriefs und des gegenwurtigen petbriefs. Geben nach Cristi geburd viertzehenhundert und im funfundnewntzigisten jaren an erichtag Scolastice der heiligen junckhfrawen.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 454f, Nr. 3374