Dem erwierdingn inn got vatter und hern abtte Johannssn zu Lambach unnsserm genadingn herrn empewtt ich Thomon Thietnshaimer, burger czu Tullen, Barbara sein elliche hausfraun unnser willig undertanig dienst czuvoran und fuegen euren genadn cze wissn, das wir unnserm liebm brueder und schwager Wolfganngn Thietnshaimer, burger im Newnmarckht, Elsbettn seiner hausfraun und allen irn erben all unnser erbliche gerechtigkait tze gantzer ewirger verczicht kauflichn cze kauffn gebn habn, dy wir dann gehabt habn an und auf der Hochredt dy halbe czu nagst gelegen bey Reischaw in Tawfkircher phar und Edlinger lanndt gericht, das dan eur gnadn goczhawss dienstpar ist umb ain suma gelts, der wir von inn gar und gantz an schadn entricht und gewert sein. Darauf bit wir baide euer genad als unnsern genadingn herrnn, eur genadt welle meinem liebm wrueder Wolfganngn Thietnshaimer, Elsbettn seiner hauesfraun irn baidn erben umb dy egemelt mein gerechtigkait irer czuegehorungen brieff und sigll darumben gebm und das bestattn. Und so nun eur genadt das gethann hat, alsdann gelobm und versprechn wir baide egemellte und fur all unnser erbm euern genadn und allen euern genadn nachkhomen bey unnsern eren und trewen an aidestatt und in kraft des bettebriefs yetzt noch hinfur in ewr genadn insigll nichtz czu redn wenig noch vill wann das unnser gueter will und vleissiger bette ist, und wellen dann das als umb unnsern genadingn hern underthanigklich verdienn. Und schickhen auch des darumben euren genadn den offenn bettebrieff verpetschaftn durch unnser baider egedachten vleissiger bette willn mit des erberen beissn Bolfganng czu Kirigdorff yetzt einer genadn ambtman gein Lambach aigen aussn aufgedruchtn petschafft, im und sein erben an schadn, auch eurn genadn und allen eurn genadn nachkomen und dem erwierdingn gotzhauss Lambach an aller obbrigkeit unengolltn umb euer genadn insigll an den kaufbrief umb das petschafft auf dy bettebrief sindt, czeigen dy erberen Bortlme Fallinprun gerichtschreiber im Erllach, Steffann Edmair zu Vattershaim, Ulrich Lechner zu Kalhamierdorff und ander leut mer darunder wir unns baide und fur all unnser erbn verpinten allestat czu halltn so der brief innehellt und ausweist, der geben ist an sundtag vor gotzleichnambstag nach Cristy unnsers liebn herrn geburde vierczehenhundert und im funffundnewntzigstn jare.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 465-467, Nr. 3383