Wir Johanns, von Gots genaden abbt zu Lambach, bekennen mit dem brief, daz unns ann ainem aufgabbrief aufgesandt hat Mertt Schuster, burger zu Wells, und sein hawsfraw Agnes, und haben mit wolbedachtem mut und gutem willen recht und redlichen verkawft zway tagwerch ackher aus dem viertail am Slechhof, alls dy mit rainn gemarcht sein mit iren zugehorungen in Wellser pharr gelegen, erbrecht von unns und unnserm gotshaws und haben dy ze kawffen geben Jorgen dem Stainpeckhen, auch burger zu Wells, Margrethen seiner hawsfrawen und iren paiden erben umb ain summa geltts, der sy von in ganntz und gar ausgericht und betzalt worden seinn zu rechten tagen on allen schaden. Auf sollichs paten unns dy obgemellten Mert Schuster und sein hawsfraw Agnes mit diemutigen vleis, daz wir dy berurten zway tagwerch ackher mit iren zugehorungen dem genanten Jorgen Stainpeckhen, Margrethen seinen hawsfrawen und iren paiden erben genedigklichen geruchten zu bestatten und zu verleihen, daz wir dann allso hiemit wissenlich in kraft des briefs gethan haben, was wir in rechtlichen daran bestatten und verleihen sollen oder mugen, doch das man unns und unnserm gotshaws alle jar jarlichen davon raichen und dienen soll zu unnser lieben frawntag der dinstzeit funf Wienner phenning. Es seinn auch dy bemellten Mert Schuster, sein hawsfraw Agnes fur sich und ir paider erben der berurten zwayer tagwerch ackher aus dem viertail des Slechhofs und seiner zugehorung des genanten Jorgen Stainpeckhen, seiner hawsfrawen Margrethen und irer paider erben recht gwern und furstand fur all rechtlich ansprach wo und wann in des not und durft beschicht mit dem rechten alls dann sollichs kawfs und lanndes ob der Enns recht ist ongevar. Wir offnen auch, daz sy kainerlay wandlung damit nit haben sullen in kainerlay weis an unnser hanndt und guten willen und sollen unns auch alles daz davon leiden und dulden, daz annder unnsers gotshaws erbler gen unns leident und duldent unvertzigen unnsers gotshawss rechten in allen sachen. Zu urkund geben wir in des allso den offenn brief besiglten mit unnserm anhanggunden insigl, der geben ist alls man zalt nach Cristi geburd viertzehenhundert und im funfundnewentzigisten jaren an montag vor Potenciane der heiligen junckfrawen.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 464f, Nr. 3382