Maximilian von Gots gnadn Romischer kunig etc.

Ersamer geistlicher lieber andechtiger. Wir haben dir vormalen geschriben und bevolhen die zway missive, so dir von weilennt unnserm lieben herren und vater dem Romischen kaiser etc loblicher gedechtnuss und uns Hannsen Zertel und das hofrichterambt zu Lambach berurennd zugesanndt sein sullen mitsambt ainer unnderrichtung zu was zeit dir dieselben ubergeantwurtt worden seien unnsern hawbtman stathaltern und regennten zu Wienn furderlichen zu schikhen, darauf du antzaigest, wie dieselben brief verlegt seien, villeicht auss fursorg, das dieselben brief halben mit dem gemelten Zertel gehanndelt werden, daraus dir als ainer geistlichen person an irem ambt nachtail und schimpf ersteen mocht. Und wann uns aber nicht gemaint ist, das dir von der berurten sachen wegen ainicherlay schimpf oder deines stannds halben nachtail zugefugt werden sulle und solh dem fursorg vormalen wol fur augen genomen haben, demnach empfelhen wir dir abermalen ernnstlich und wellen, daz du die yetzgemelten brief noch fleissigklicher suchest und dieselben unsern hawbtman stathaltern und regennten mitsambt der bestimbten unnderricht nochmalen unverzogennlich zuschikhest und ferrer darinnen kain ausflucht gebrauchest, damit deshalben annderer hanndlung nicht nott werde. Daran tust du unnser ernnstliche maynung. Geben an eritag vor sand Bartholamees des heiligen zwelfboten tag anno domini etc. lvvvvvii unnserr reiche des romischen in zwelften und des hungrischen im achten jarenn.