Dem erwierdigenn geystlichenn herrenn herrenn Johannsenn abbt zw Lambach unnserm genading herren enpewtten ich Thaman Swannser unnd ich Wolfganng und ich Hannss, all gebrueder des Joring Fuchssenn etwenn gesessenn zu Prayttenschuczing auff der Fuchshueb inn Swannser phar elichen chinder unnser willig dienst bevor. Wier fuegenn ewrn genaden zw wyssenn, das wir recht und redlichen verkaufft unnd kauflich zw kauffenn gebenn haben unnserm liebenn vettern Hannsenn zw Peinczdorff inn Swannser phar unnd allenn sein eribenn die er hat oder noch chunfftigklich gewingt, unnser hueb mit aller zuegehorrung gelegen zw Prayttenschuczczing in Swannser phar, genandt die Fuchshueb, ist dienstper ewrn genaden und gehort mit der herschafft ewrn genaden unnd ewrn genaden gotzhauss zue umb ain summa gelt, der wier von inn zw rechtten tagen an allenn schadenn recht und redlichenn schon bezalt sein wordenn, unnd senndenn ewrn genadenn darumbenn dew offen petzettel unnd pitten ewr genad mit unntertanigem vleys, ewr genad well dem obgenantten unnserm liebenn vettern Hannsen Ortlein unnd sein eriben ein gewonndlichenn lanndtlewffing kaufbrieff darumben gebenn unnd mit ewrn genadenn insigel ververtigen unnd bestattenn. Unnd so ewr genad das den das alzo gethan hat, lobenn wier ewrn genadenn fuer unns unnd all unnser eriben ewrn genaden unnd ewrn genaden gotzhawss inn ewr brieff und sigel auch vertigung nicht zw redenn noch annders yemanndt vonn unnsernn wegenn unnsern treun aydes weys alles treulich ungeverlich. Unnd gebenn ewrn genaden darumben dew offenn petzettel, durich unnser vleyssing gepet willenn bewartt mit der erbern weysenn Hannsenn Puessinger unnd Wolfganngenn Wuffinger, bayd burger zw Swannss, payder aufgedrukchten petschadt, doch inn unnd irnn paydenn eribem an schadenn, daruntter wir unns mit unnsern treun aydes weys verpintten, alles war unnd stat ze haltten innhalt des briefs. Zeugen der sachenn unnd gepet umb die petschadt auff die petzettel, auch umb das insigell an den kaufbrieff sind die erbern Wolfganng Rosennkranncz, Wolfganng Mair bayd burger zw Swannss, Leonnhart Lexsel zw Wuffing aus Swannser phar unnd annder erber lewdt meniger. An phincztag vor Fabiani unnd Sebastiani beschechenn anno domini etc. im lxxxxvii

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 503f, Nr. 3419