Dem erwirdigen in got und geistlichn herrn hern Johannsn abbte zu Lambach enpewtt ich Wolfganng zu Posndorff, ich Anna des Leonhartn zu Posndorff eeliche hawsfraw, ich Niclas des Leonharten Hubmer zu Posndorff saligen sun in Weiborner pfarr gesessen, ich Wolfgang zu Krotndorf in Gaspoltshofer [pfar] gesessen, ich Barbara des Leonharten Tislar zu Wielting hawsfraw in Gebaltzkircher pfar gesessen, ich Elspecht, des Steffan Hinderlewter in Weiborner pfar saligen hawsfrawn unser gehorsam willig unndertanig dinst bevor. Wir fuegen ewren genaden zu wissen, das wir all unnser erbschaft und gerechtikait, so wir gehabt habm zu Armyng und zu Grueb mit aller zugehorung in Gebaltzkircher pfar gelegen in Starhenberger lanndtgericht, dy dan dinstpars urbar sind ewrer genaden gotshawss Lambach zu statem ewigen kauf verkawft habm unnsernn lieben vetern Wolfganngn zu Armyng, der hewslich darauf siczt, Margrethen seiner hawsfrawn, Leonharten zu Wielting, Barbara seiner hawsfrawn und yetweders tails allen iren baiden erbm, die sew habm oder noch gewingen umb ain summa gelts, der wir von in schon entricht sein nach unnserm wolgefallen, als ewr gnad das an dem kaufbrif hinfur mit mer worten vernemen werdet, darauf bitten wir ewr gnad mit sonnderm vleis, wellet obbemeltn kawffern und kawferin und allen iren erbm ain genuegsamen lanndtlewffigen kawfbrief dar uber verfertigen mit ewrem insigl. Und wan ewr gnad das getan hat, so geloben wir ewren gnaden und ewren nachkomen fur uns, all unser erben in ewr genaden verfertigung brief und insigl nicht zu reden vil noch wenig in kainerlay weis angevor. Des zu warm urkund schicken wir ewch den offen betbrief verfertigt durch unnser vleissigen gepet willen mit des erbern weisen Wolfgang Hainpuecher, der zeit ewrer gnaden ambtman aigen aufgedruckten pettschadt, doch im, sein erbm an schadn, darunder wir uns all obgemelt fur uns all unser erbm verpintn bei unseren trewen an aides weis, alles das war und stat zu halttn inhalt des betbriefs. Zewgnus der sachen und der gepet umb ewr gnaden insigl und umb das gegenwurtig petschadt sind dy erbern Sigmund Mosl zu Hofpergkhaim, Hanns Stegmayr zu Kirchdorff, baid in Gaspoltzhofer pfar gesessen, Leonhart Hinderholtzer purger zu Wolfsegkh und mer frumer lewt genueg. Geschehen an mitichen vor letare in der vastn nach Cristi geburde viertzehenhundert und in dem achtundnewnntzigistn jarnn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 553-555, Nr. 3454