Dem erwirdigenn in got und geistlichen herrn hern Johanns, abbt zu Lambach, unserm gnedigenn herrn embieten ich Wolffgang Hohenfurter zu Grunpach auf dem Gaterlehen unnd ich Hanns Hohenfurter, wirtt zu Gunskirchen, unser gehorsam dinst zuvoran. Gnediger herr, wir fugen ewrn gnaden zu wissen, das wir dem erbern weisenn Steffann Lehner, purger zu Wells, und allen seinen erbenn recht und redlich verkaufft wie kauffs und landsrecht ist, geben haben haws und hoffstat zu Mostall gelegen daselbs zu nahst an den Rorer gelegen, mit willen und wissen des erbern Hainrichs Cappeller, der die zeit heuslich darauf wonhafft und seins tails am haws erberlichen bezalt ist, sonder die hofstat ist geprochen aus dem guet genant das Lehenn beim Gatern. Wir haben auch mit gutem willen auf die hof stat geslagen vier pfening jerlicher ewiger gult uber den gewondlichn dinst, so man ewrn gnaden vor vom lehen beim Gatern dint und raicht, die fueran in ewr gnadn urbar ze raichen und ausrichten, darumben er unns geben und bezalt hat ain summa gelts guter landswerung, daran wir volligs guets genugen habenn, ewr gnaden demuticlich bittend, welle geruchen dem benanten Steffan Lehner und sein erben ainen gewondlichen kaufbrief dar uber gebenn und mit ewrn gnaden insigl verfertigen, so das bescheen ist, globen und versprechen wir obenantn fur uns, fur all unser erben ewrn gnaden und dem gotshaws Lambach in solh brief und sigl nit ze reden, dawider nichts sprechen, handln noch thun gar in keine weis. Mit urkund versorgt mit der erben weisenn Jorigen Mullehner ewr gnaden ambtman und Pangratzn Scheibl, burger zu Wells, aufdruckhten petschadten, die wir obenanten vleissig darumbn gepeten habenn, doch in, irn erben an schaden, sonder wir und all unser erben sein hiemit under ewr gnaden insigll verpunden treulich aidesweis maynung oberurten kauffs war stat ze halten. Geben an mitichen nach mittvast nach Cristi unsers lieben herrn geburd vierzehenhundert im acht und neunzigisten jarenn.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 555f, Nr. 3455