Ich Hanns Raid gesessen zw Mitlperig und ich Steffan Raid, sein brueder, bechennen und thuenn chundt offenlich mit dem gegnwurtigen brieff allen, den er fur chumbt, getzaigt oder horent lesen, das unnser vatter Toman Raid saliger weylant gesessen zw Stierberckh eingenomen und enphfangn hatt funffthalbs und zwaytzck phfundt phfenning von wegen seines brueder Caspar Raidn salign etwann auch gesessen zw Stierberckh gelassen kinder mit namen Anna und Thaman, das dan erblich auf sew gefalln und chamen ist, aber nach abganngk unnsers vatern saling hab wir als dy nagstn erbm und gerhabm mit sambt unnserm enn Hannsen Sleiher und auch vetern Wolfgangn Phfeiffer mit vleis gebetn unnsern swager Merten Trostel, das er sich an stat unnser umb dy gerhabschafft an genomen hatt und habm ym eingeantwurt am erstn ain uberlendt gelegen in der Gruennaw, das denn ze lehen ist von dem hochwirdign und genadign herrn abt von Lambach und alle jar jarlich dinstper ist seinem gotzhaws daselbs funnff und viertzk Wienner phfennyng zw sand Michelstag, das denn unnser vater saliger chaufft hatt vom Peter Weber etwann gesessen zw Newndorff umb sechtzehenthalb phfundt phennyng und darzue hab wir ym gebm yn peraittem gelt funfft halb phfundt phennyng, das sol er ynn habm den chindern mit sambt dem uberlendt und hinfur verantwurten und nicht mer, sunder was er ein nymbt umb dy nutz von dem uberlendt aber dy funffthab phfundt uber dy zwaytzke habnt frume erber leyt hernach gemelt den benantn zwayer kindern abgesproch aus solicher ursach, das unnser vater Taman Raid saeliger von yeren wegn hatt aus gebm und betzalt dy zerung, so denn beschehn ist an der ersten bericht und sew auch trewlich von juengt auff ertzogen hatt, item dy anfaylung des uberlent hat bevor Wolffgang Zubaich zw Abtslag, so man das verchauffn wolt, wenn er das aber nit chauffen wolt, so mag man das gebm wemb man will und bey der bericht und erwellung des gerhabm seind gewesen dy erbern Wolffgang Wanndel zw Abtslag, Anndre Smyd ym Stainpach, Steffan Zwbaich zw Weygkhartslag, Lucas zw Newndorff, Michel Zols zw dem Grassenperichtoltz, Hanns Weber zw dem Otten, Hanns Sleyher und Wolffgang Phfeyffer, dy wir mit fleis dartzue gebetn habm, und auch Niclas Pretrer zw Waltherslag als ain ambtman ains tails, und Hanns Schrennck als ain ambtman des andern tail den gegenwurtigen brieff geb wir obgenant Hanns und Steffan Raid dem benanten unnserm swager Mertn Trostlen bewart und bestatt mit der erbern und egemelten Niclasen Pretrer, Hannsen Schrenncken, Wolffgangn Wanndlen und Steffen Zubaich mit yren auff gedruckten petschadn darumb wir sew mit fleis gebetn habm, doch yn und yren erbm an schadn. Gebm nach Cristi gepuerdt tausent virhundert und ym neynundnewntzistn jar am suntag vor sand Jorgen tag.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 602f, Nr. 3498