F(ridericus) dei gratia Romanorum Imperator semper augustus, Jerusalem et Sicilie rex vniuersis iudicibus et mutariis suis per ducatum Austrie et Styrie constitutis fidelibus suis presentes litteras inspecturis gratiam suam et omne bonum. Ex parte honorabilis prepositi et conuentus de Richersperge fidelium nostrorum nostro fuit culmini humiliter supplicatum, ut gratiam et libertatem ab illustri duce Liupoldo felicis memorie duce Austrie et Styrie super uectigalivm et pedagiorum exactione omnium rerum suarum mobilium ecclesie sue indultum nostre approbationis dignaremur munimine confirmare. Nos itaque pietate solita, qua personis religiosis fauor noster adesse consueuit, deuotis eorum precibus fauorabiliter inclinati gratiam et libertatem, quam ab eodem duce Liupoldo in suis hactenus optinuerunt priuilegiis in deductione rerum suarum mobilium super vectigalium et pedagiorum exactione eisdem preposito et conuentui de nostre pietatis gratia confirmantes mandamus et presentium auctoritate precipimus vniuersis, quatenus gratiam et libertatem eandem presentis approbationis nostre munimine roboratam iuxta formam priuilegii sui predictis preposito et conuentui de Richeresperge more solito salubriter conseruetis, ut iustam de uobis non habeant materiam conquerendi. Data apud Wiennam anno dominice incarnationis millesimo, ducentesimo, tricesimo sexto, mense Marcii, decime indictionis.

Source Fulltext: OÖUB 3 (Wien 1862) Nr. 52, S. 59