Nos Wernhardus Dei gratia Pataviensis Ecclesie Episcopus omnibus in perpetuum. cupientes ad noticiam tam presentium quam futurorum pervenire honestam conventionem venerabilis Prepositi C. et totius Collegii Richerspergensis nobis exhibitam in hec verba: In nomine Domini amen. Cum secundum Jura canonica ea, que infirmari vel vituperari possunt, debeant precaveri, Nos Chunradus Dei misericordia indignus Prepositus totusque Conventus in Richersperg excitati et inducti necessitate et utilitate Ecclesie nostre convenientes nimirum in templo nostro volentes intendere reformacionem Ecclesiarum nostrarum in Marchia, Pramperch et Edliz, que ex donacione sanctissimorum in Christo Patrum et Dominorum Chunradi et Eberhardi Archiepiscoporum Salzburgensium pleno Jure ad nos spectare dinoscuntur, consensu et auctoritate reverendi in Christo Patris nostri domini Wernhardi Pataviensis Episcopi statuta edidimus et Juramento firmavimus infra scripto: primo quod ipse, qui proxime Prelatus noster fuerit, nonnisi de consensu Collegii nostri Rectorem vel Rectores in dictis Ecclesiis preficere audeat, nisi forte ipsum Collegium vel aliqui ex fratribus malitiose contradixerint vel pravitate aliqua sint corrupti. Idem etiam fratres, qui pro tempore canonice instituti fuerint, in omnibus regulariter se habeant, sicut debent; in publico cappis vel alia veste non notabili utantur. Et quia: "ve soli, quia, cum ceciderit, non habet sublevantem“, quilibet socium secum habeat sue professionis, qui sibi ex superioris arbitrio fuerit deputatus: in secundo vero anno Cenobium suum visitantor super negligentiis, excessibus et mala administratione Prelato coram fratribus rationem debitam reddituri. Et quia Prelatus quilibet rerum Ecclesiasticarum Procurator est, non Dominus, multo plus hii, qui nec proprium habere debent; quidquid iidem Rectores habere possunt preter necessarias et modestas expensas in domo sua Preposito fideliter omnia reservabunt in usus Ecclesie nostre utiliter convertenda. In signum tamen subiectionis secundum eventum temporis et qualitatem anni quilibet Rectorum summam competentem ad arbitrium et moderamen Prepositi, qui non malitiose sed sincere et districte in hoc se habeat, pro cultura vinearum nostrarum infra dies Rogationum Magistro curie nostre in Chrems annis singulis assignabit. Nullus eciam unquam in sepe dictis Ecclesiis instituatur, nisi qui prius coram fratribus voluntarie iuret se pro posse et nosse hec et omnia ac singula servaturum. Et ut hoc salubre statutum nostrum a nobis et nostris successoribus sine retractacione in perpetuum firmiter observetur, ad cautellam et robur Sigilli nostri munimine et iurisiurandi adstipulacione voluimus confirmare, pax multa custodientibus legem et presens statutum nostrum. Si quis vero, quod absit, ex nobis vel successoribus nostris ausu temerario vel presumptione iniqua huic nostro decreto contraire presumpserit et legitime monitus non resipuerit, preter reatum periurii, quod ipso facto incurrit, consortio fratrum et administracione Ecclesiarum sine spe restitucionis perpetuo sit privatus. Acta sunt hec anno Domini MCCLXXXVII tertio nonas Febr. Hoc statutum honestati in nullo contrarium, in quo etiam non mediocris profectus prefate Ecclesie dinoscitur provenire, ratum et gratum habemus et in eius robur presentem cedulam Sigilli nostri robore tradidimus consignatam. Datum Patavie anno Domini MCCLXXXVII pridie nonas Maii.

Source Fulltext: OÖUB 4 (Wien 1867) Nr. 65, S. 57-59