Ich Gebhart der Swentter mein hawsfraw vnd all mein erben wir veriehen offenbar das wir sullen gelten herrn Dietmarn probst ze Reichersperg vnd dem selben goczhaws newn pfunt pfenning pazzawer munzz, der wir in vnd das goczhaws richten sullen an alles vertziehen auf sant Jorigentag der schirst kumbt. Teten wir des nicht, so sol ich vorgenant Gebhart der Swentter nach dem tag vngemont invarn mit ainem pfärt gen Obernperig in ein erber gasthaus, vnd darum laisten angeuer als laistens recht ist als lang, vntz das der probst vnd das gotzhaus seines gelts gar vnd gantz verricht wird. Waer aber das ich vor ehaft not nicht gelaisten mo^echt, so sol ich ainen mein genoz an mein stat inlegen in allen den rechten vnd voruerschriben stet. Waer aber das wir die laistung verzugen, wie getanen schaden der probst vnd das gotzhaws dez nam, den luben wir in abzetun gar vnd ganz an alles geuär. Vnd ze vrchund geben wir den brief versigelt vnder Hainrich dez Messenpeker insigel, wenn wir aigner insigel nicht enhaben. Der geben ist drewzehen hundert jar darnach in dem drew vnd funftzkisten jar an sand Giligentag.

Source Fulltext: OÖUB 7 (Wien 1876) Nr. 257, S. 262f.