Ich Wernhart Setzzer ze den zeiten richter ze Pazzow vergich offenbar mit dem brif, daz vor mir veriehen habent Hainreich der Süzz purger ze Pazzow vnd Chvnigund sein hausurow, daz si von irn rechten notturft wegen vnd durich vleizzig gepet auf irem haus gelegen an dem nevnmarcht in der lantstrazz zenaechst dez Pamhakleins haus recht vnd redleich mit gesambter hant ze chauffen habent geben fumf pfunt pazzawer pfening purchrecht dem erwirdigen herren herrn Dietmaren probst ze Reichersperg vnd dem conuent do selben vmb fumf vnd sibenczikch pfunt wienner pfenning, der sev si gar vnd gantzleich gewert habent mit der beschaiden, daz si in daz vorgenant purchrecht iarchleich davon raichen vnd geben schollen zu den drein zinstagen in dem iar ze weinachten ze pfingsten an sant Michelstag, zu igleichem dem selben tag zehen vnd dreitzehen schillinge wienner pfenning, vnd als oft in daz nach der selben tag ainen oder mer wurde versezzen virtzehen tag, als oft sol man in immer hin nach auf dem vorgenanten haus zu sambt dem purchrecht ze wandel veruallen sein zwelif wienner pfenning, vnd mugen auch di vorgenanten herren ze Reichersperg oder ir anwalt in dem oben genanten haus zusperren vnd pfenten vmb ir versezzen purchrecht vnd vmb di veruallen wandel an als gericht als oft vnd als verre vntz duz si dez aller ding gaentzleich gewert werdent. Ez habent auch recht der vorgenante Hainreich der Süzz sein hausurow oder swer daz egenant haus furbaz innhat, daz obengenante purchrecht wider ab ze chauffen zainczigen je ain pfunt purchrecht vmb fumfczehen pfunt wienner pfenning, oder mit einander di fumf pfunt purchrecht ab ze chauffen vmb fumf vnd sibenczikch pfunt wienner pfenning, wann si mugen oder wellent. Vnd waz dez versezzen purchrecht vnd der veruallen wandel ist oder wirt, daz sol mit sambt der widerchauff in werden an allew widerrede. Mid vrchund dez brifs den ich darvber geben han versigelten mit meinen insigel, daz ich di weil von dez gerichtz wegen gehabt han. Dez sint zeugen Jacob Gruber Hainreich Perchhaimer Albertus Schreiber Vlricus sein sun vnd ander erber laütt. Der geben ist an sant Michels abent dreutzehen hundert iar vnd in dem nawn vnd fünftzkisten iar.

Source Fulltext: OÖUB 7 (Wien 1876) Nr. 651, S. 661f.