Ich Vlreich der Ayterpech purger ze Chrems vnd ich Katrey sein hausvraw vnd ich Peter sein sun vnd all vnser erben wir veriehen offenleich, daz wir ze chauffen haben geben vnsern weingarten ledig vnd vnuerchumbert, der gelegen ist in der Peunt neben Reychersperger hof vnd haisst datz Putzel mit perchmaysters hant herrn Vlreichs di zeit hofmaister datz Gneuzzendorf in der erbern geystleichen herren hof von Allerspach, dem man all iar da von geit suben phenning wienner muns ze purchrecht an sand Michels tag, dem erwirdigen herren hern Dyetmarn di zeit probst ze Reichersperg vnd dem gottzhaws da selbs vmb vier vnd dreizk phunt wienner phenning di der eegenant weingart gestanden ist Barochen dem Juden von Lincz, den habent si mit vnserm guetleichem willen von im gelo^est vmb di vorgenanten phening vnd ist ir erchauffcz guet mit vrchund dez priefs, der versigelt ist mit dez vorgennanten perchherren insygel hern Vlreichs di zeit hofmayster datz Gneusendorf vnd mit dez erbern mans insygel hern Nyclas von Weytra di zeit statrychter ze Chrems, di ich vorgenant Vlrich darvmb gepeten han in an schaden wan ich die zeit aygens insygels nicht gehabt han. Geben nach Christes gepurd dreuczehenhundert iar in dem neun vnd funifczkisten iar dez suntages nach sand Cholmans tag.

Source Fulltext: OÖUB 7 (Wien 1876) Nr. 656, S. 666