Reverendo in Christo patri ac domino domino Dyethmaro preposito in Reichersperch frater Stephanus de Gors prior fratrum ordinis predicatorum in Chremsa salutem et post decursum presentis certaminis celestis regni bravium suscipere pro labore. Quia humani generis hostis dyabolus illos precipue sedulis insidiis persequi nititur qui divinis obsequiis mancipati Christo per religionis arma fortissima virilius certare conantur et religiosius triumphare, ne contingat propter ejus versucias vos in via domini retardare, vestra pia devocio oracionum nostri ordinis auxilia postulavit, ideoque devocionis vestre merito qua ordini nostro specialis caritatis affectu jungimini sollerti consideracione pensato vobis omnium missarum oracionum predicacionum jejuniorum abstinenciarum vigiliarum laborum ceterorumque bonorum que per fratres nostri ordinis in dicto conventu nostro Dominus dederit fieri participacionem concedo tenore presencium specialem in vita pariter et in morte, ut multiplici suffragiorum presidio valeatis post hujus vite felicem transitum ad eterna gaudia pervenire. Volo insuper, ut anima vestra post decessum vestrum recommendetur fratrum dicti conventus oracionibus in nostro capitulo, si vester obitus ibidem fuerit nunciatus et injungantur pro ipsa misse et oraciones sicut pro fratribus nostri ordinis fieri est consuetum. In cujus concessionis testimonium sigillum officii duxi presentibus apponendum. Datum Chremse anno domini millesimo trecentesimo sexagesimo quinto (M° ccclxv°) in die sancti Bernhardi confessoris.

Source Fulltext: OÖUB 8 (Wien 1883) Nr. 244, S. 246