Ich Rueger von Alacht auf dem Chlingfürt und all mein erben verjehen, daz wir haben bestanden von dem erbern herren hern Dietmarn probst ze Reichersperg und von dem convent da selb ir zehent ze Stalhof chlain und grozz ze flust und ze gewinn umb zway und drezzig pfunt pfennig wienner muennzz von hinn üntzt auf di liechtmess di schirst chuemt und darnach lieber ain jar, also di zwen nüttz und darnach haben wir nichtes mer darauf ze sprechen weder wenig noch vil, und mügen den gelazzen fürbaz mit unserm gu^etleichem willen wem si wellent. Wir haben sew auch dez vor verschriben gelts gantz und gar gericht und gewert an den gegenwürtigem tag. Und zu urchund gib ich in vorgenanter Rüger von Alacht den prief versigelten mit meinem anhangundem insigel. Der geben ist nach Christs gepürd dreutzehenhundert jar darnach in dem siben und sechtzigistem jar an sand Gregori tag in der vasten.

Source Fulltext: OÖUB 8 (Wien 1883) Nr. 320, S. 313f.