Wir Johannes lantgrave zue dem Leuchtemberg pfleger in Nydern Beyern enpeuten unserm lieben getrewn Nicla dem Wendelstain richter ze Schaerding unsern grues. Wir lazzen dich wizzen daz der ersame herre der probst ze Reichersperg sein und seins gotzhaus brief vor unserm genedigen herrn herzoge Albrechten ze Strawbing gehabt und gezaigt hat da er nue naechst bey dem lande waz, und die selben brief lauttent von unserm genedigen herrn kaiser Ludweigen von unsers egenanten herrn vater saeligem dem Got genade, und da emphalich uns unser egenanter genediger herre herzog Albrecht das wir den probst und das gotzhaws ze Reichersperg bei irm briefen hielten und schirmten und niempt gestatten der si dar an irret. Also haizzen wir dich und schaffen ez auch ernstlich mit dir und mit allen den di durich unsers herrn und unsern willen tuent und lazzent von unsers herrn herzog Albrechtz und unserm wegen, daz du den egenanten probst und daz gotzhaus Reichersperg bey irn briefen haltest und schirmest alz di lauttent von wort ze wort von unserm egenanten genedigen herrn kayser Ludweigen saeligem, und daz du niemant gestattest der in die ueber var in dhainer weis. Wer aber in die uebervarn und chrenchen wolt wie der oder die genant waern mit welhen sachen das waer, so wellen und maynen wir ernstlich das du alle die pen und puezze von dem und von den nemest nach lautt irer brief und tue das on verziechen bey unsers herrn und unserm hulden und genaden. Mit urkunde dez briefs versigelt mit unserm auf gedrukchtem insigel. Der geben ist zu Strawbing an freitage am sande Johanstag zu weinachten anno domini millesimo trecentesimo septuagesimo.

Source Fulltext: OÖUB 8 (Wien 1883) Nr. 506, S. 500f.