Ich Hanns der Hunthoch vergich offenleich mit dem brief für mich und für all mein herrn frewnt und helffer und tun chund allen leuten, das ich mich liebleich und frewntleich verricht und veraint han auf ein gantz end mit dem erwirdigen geistleichen herrn probst Dietmarn zu Reichersperg und mit seines gotzhaws arm leuten von der zuesprüch wegen die ich hintz in gehabt han und darumb mir ein gelt gesprochen ist worden des ich gantz und gar gericht und gewert pin worden nach meinem willen also, das ich fürbas noch khain mein frewnt und helffer noch nyemant von meiner wegen von des oben verschribenen handeis wegen khainerlay ansprach nymmer mer süllen haben noch gewinnen in khainer weis weder mit recht noch an recht gen dem oben verschribenen gotshaws zu Reichersperig und hintz seinen armen leuten, und ob ich das fürbas in khainer weis indert über für da mich Got vor behuett als oben verschriben ist, so hat mir der obgenannte probst oder wer des gotzhaws ze Reichersperig ze den zeiten pfleger ist und auch die armen leut di den schaden enplangen habent und wer auch zu den zeiten pfleger zu Scherding ist darumb zuesprechen von gerichtz wegen umb all schaden di si von mir enpfangen habent. Ich sol auch dem oben verschribenen gotzhaws und all den seinen fürbas zu dienst werden und füderleich sein als verr und ich vermag. Mit urchund des briefs, den ich vorgenannter Hanns der Hunthoch darüber gib versigelten mit meinem aigen anhangundem insigel, und ze einer pesseru sicherhait under meines lieben ohaims Hannsen des Pirchinger und mit Walchun des Hadrer und Chunrat des Raspen anhangunden insigeln. Des handeis sind zeugen und taydinger der erber vestt ritter her Lienhart der Popenperger Präntl Ottenperger Sighart Pawer Herman von Holtz Hanns Zaler purger zu Scherding und ander erber leut genueg. Geben an sand Giligen tag nach Kristes gepürd drewczehenhundert jar und darnach in dem zway und sibentzkistem jar.

Source Fulltext: OÖUB 8 (Wien 1883) Nr. 605, S. 606