Ich Chunrad der Vesemstorffer dew zeit Richter ze Scherding bechenn offenleich mit dem brief allen den di an sehent oder hörent lesen, daz für mich chom do ich sazz ze Scherding an offner schrann Fridreich von Dra^echselhaim vnd sein nachtpawrn vnd paten gerichtz hintz dem erwi^erdigen Herrn hern Dietmarn probst ze Reichersperg vnd hintz seinem Gotzhaus, von des paches wegen der da haizzet der Senftenpach. Da solten si ein abcher haben dez samptztag nachtz vnd hieten des recht. Des antwurtt der vor genant probst mit seinem vorsprechen vnd sprach, er sa^ezz des wassers vnd paches in nutz vnd gewer er vnd sein gotzhaus mer dann zway hunndert jar vnd hiet dez gu^etew vrchund. Nu sagt im frag vrtail vnd das recht: sein vrchund würd gelesen, vnd schult darnach geschehen waz recht wär. Daz ward also gelesen alz es daz recht gesagt het. Dar nach ward aber gefragt, waz nu recht wär. Da sagt im ffrag, volg, vrtail vnd daz recht: er scholt des wassers vnd paches beleiben pey seiner nu^otz vnd gewer vnd schult auch hewt vnd fürbaz mit ruen vor in sein vnd schulten im die abcher vermachen vnd schult man in dar zu^e schirmen, als des landes recht wär vnd dez schult man im vnd dem gotzhaus auch einen güten prief geben von gerichtz wegen. Dez ward im auch geben. zeugen an di schrann di erbern läwt her Seyz der Püchperger zu dem Wildenstain, her Ekchart der Tanna^er, her Ffriedreich der Stal, her Toman der Hautzenperger, Hans Pirichingaer, Hilprant Ottenpergär, Chunrat Rassp, Herman von Holtz, Steffan Zellär, Hainreich Ödenwiser vnd ander erwerig läut genüg. Vnd dez zu Vrchund gib ich vor genanter Chunrat Vesemstorffer dem egen(anten) probst vnd seinem Gotzhaus den prief von gerichtz wegen mit meinem anhangundem insigel besigelt. daz ist geschehen nach Christes gepürd dreutzehen hundert iar vnd in dem acht vnd Sibentzkisten iar des mitichen nach Margarete.

Source Fulltext: OÖUB 9 (Wien 1906) S. 480-481