In nomine domini amen. Nos Sipoto de Lonstorf tenore presentium protestamur, quod de ducentis et quinquaginta talentis, que nobis Ecclesia Domus sancti Floriani soluere tenebatur, centum et quinquaginta eidem relaxauimus intuitu elemosine simpliciter propter deum. Super centum uero talentis residuis taliter inter ipsam Ecclesiam et nos discretorum uirorum industria mediante conuenit, quod pro eisdem Centum talentis nomine solutionis prepositus et Conuentus de communi consensu annuos decem talentorum nobis redditus tradiderunt. Nos uero memoratis debitis ad plenum renuntiantes, eosdem redditus de manu nostra liberali animo et deuoto pro nostra et nostrorum (sic. Verosimiliter supplendum: progenitorum) salute predicte contulimus Ecclesie sub hac forma, ut prefati redditus integraliter per vnum de fratribus Ecclesie, qui uel nobis uel nostris heredibus in posterum ad hoc placuerit et per prelatum de Consilio Conuentus institutus fuerit, taliter annis singulis in perpetuum dispensentur. De duobus talentis reficientur fratres in anniuersario Obitus nostri die, quem annis omnibus deuotione congrua peragere tenebuntur. De dimidio conparabuntur misse, dimidium infer fratres distribuetur, de quinque uero talentis elemosine inter pauperes dispergentur, duo residua ad structuram Monasterii tribuentur. Pro memoratis uero decem Talentorum redditibus curiam in Sumerowe nobis deputauerunt, cuius prouentus, cum ad predictam summam nequiuerint peruenire, dimidiam carratam vini addent pro reddituum conplemento, donec in locum illorum alios totidem talentorum redditus conparauerint domino concedente. Quod si ipsi uel eorum successores sine legitimo inpedimento contra formam uenerint prenotatam et bis uel ter admoniti neglecta non suppleuerint, liberum erit filio nostro uel aliis heredibus, qui erunt pro tempore, se de redditibus intromittere memoratis. Testes huius rei sunt Domini Nanthohus de Alnsuelt, Pilgrimus de Ebelsperc plebani. Chv^onradus de Sumerowe, Chv^onradus de Hartheim, Tidericus officialis et Fridericus de Walde senior Milites. Hainricus de Su^omerowe junior, Hainricus de Lonstorf, Herrandus de Presek et Weichardus, jtem Hvlricus (sic) Muttarius et Henricus de Ascha, Ciues Linzenses et plures alii, qui huic ordinationi interfverunt, audiuerunt pariter et uiderunt. Nos quoque presentem litteram de hiis conscribi fecimus et Sigillorum domini de Sumerowe et Heinrici filii nostri, quia proprio caremus Sigillo, munimine roborari. Acta sunt anno domini M. CC. LXXV. VIII. kalendas Februarii.

Source Fulltext: OÖUB 3 (Wien 1862) S. 417-418, Nr. 457