Wernherus dei gratia sancte Maguntensis Sedis Archiepiscopus, Sacri Imperii per Germaniam Archicancellarius vniuersis christi fidelibus per Patauiensem diocesim constitutis Salutem in eo, qui est omnium uera salus. Licet is, de cuius munere uenit, ut sibi a fidelibus suis digne et laudabiliter seruiatur, de habundancia pietatis sue, que merita supplicum excedit et uota, bene seruientibus maiora retribuat, quam ualeant promereri, desiderantes tamen populum domino reddere acceptabilem, christi fideles ad complacendum ei quibusdam illectiuis muneribus, indulgenciis scilicet et remissionibus inuitamus, ut exinde reddantur diuine gracie apciores. Cupientes igitur, ut Ecclesia sancti Floriani Canonicorum regularium ordinis sancti Augustini Patauiensis diocesis a populo christiano congruis honoribus frequentetur, de omnipotentis dei misericordia, beatorum Petri et Pauli apostolorum eius ac beati Martini meritis et auctoritate confisi omnibus uere penitentibus et confessis, qui ad dictam Ecclesiam in die beati Floriani Martiris, anniuersario dedicacionis eiusdem Ecclesie, in die beati Augustini Episcopi et in quatuor festiuitatibus gloriose virginis Marie, videlicet Annunciacionis, Assumpcionis, Natiuitatis et Purificacionis annis singulis humiliter et deuote duxerint accedendum diuine propiciacionis graciam petituri, Quadraginta dies de iniuncta sibi penitencia misericorditer relaxamus, dummodo de loci diocesani uoluntate procedat. Datum apud sanctum Florianum Anno domini Millesimo CC. LXXVI. Nonis Decembris.

Source Fulltext: OÖUB 3 (Wien 1862) S. 452-453, Nr. 489