Ich Chunrat von Harthaim tun allen den chunt, die disen brief sehent oder lesent, die nu lebent oder her nach chu^enftig sint, Daz ich herren Chunraten von Chapell meinen weingarten ze Chritzendorf geben han an alle ansprach vnd auch mit gu^etem willen meiner pru^eder vnd pin auch dez selben weingarten ze Chritzendorf sein gewer an aller stat mit soleicher beschaidenhait, daz er hab auf alle deu vnd ich han, ob er dhainen schaden na^em an disem gewerft. Vnd daz daz sta^et vnd vnuerchert beleibe, gib ich iem disen brief mit meinem Insigel vnd mit anderen Insigeln, die hie an disem brief sint, vnd mit disen zeugen, die ich hie nenne: her Ott von Volkenstorf, her Hainrich von Volkenstorf, her Vlreich von Chappelle, her Hainrich von Lonstorf, her Perchtolt von Harthaim, her Dietreich der aman, Ruger der Hu^etter, Hainreich von Traun, Hainreich von Dietreichinge. Vnd daz ist geschehen, do von Christes gepurd ist gewesen Tausent iar vnd zwai hundert iar vnd sechs vnd achtzikch iar an sand Gallen tag.

Source Fulltext: OÖUB 4 (Wien 1867) S. 50, Nr. 56