Quoniam humana natura prona est ad dissenciendum, necesse est, ut homines facta sua litterarum testimonio perpetuent et confirment. Proinde ego Heinricus de Nenzing scire cupio vniuersos presentem paginam inspecturos, quod dominus Vlricus venerabilis prepositus, Einwicus decanus totusque Conuentus Domus sancti Floriani Curiam suam in Geroltstorf, que per negligenciam colonorum ipsam possidencium adeo fuerat desolata, vt ad debiti seruicii redditionem minus uideretur sufficere, michi et vxori mee Benedicte filie Chunradi dicti Cesaris iure contulerunt precario pro tempore uite nostre tantummodo possidendam, sperantes, quod per me ad statum et seruicium possit debitura reuocari, condicione tamen huius modi mediante, vt in omnem euentum, hoc est omni occasione legitimi inpedimenti, videlicet grandinis, gwerre, incendii, pisez uel quocumque nomine censeri poterit, exclusa quinque scaphia siliginis et duo scaphia avene et medium talentum denariorum pro minutis seruiciis ipsis debeamus annuatim de eadem Curia ministrare. Hunc utique censum denariorum videlicet et annone, si ante Natiuitatem domini soluere neglexerimus quacumque causa, ut premissum est, interueniente ego cum vxore mea penitus priuabimur omni iure nostro, quod pretextu collacionis huiusmodi nobis videtur conpetere in curia memorata, et ipsis licebit de ea ordinare nobis non contradicentibus nec prohibentibus nec indigne ferentibus, quiquid Ecclesie sue uiderint expedire. Si uero in solucione census iuxta formam prehabitam non fuerimus negligentes, quiete possidebimus, quoad uixerimus, Curiam prelibatam. Vt autem uiam carnis ingressi fuerimus vniuerse, prelatus, qui tunc temporis eidem prefuerit Ecclesie, vel eius nuncius de ipsa Curia irrequisitis heredibus nostris, consanguineis, affinibus aduocato se continuo intromittet. Sed et media pars tocius annone in ipsa curia culte, siue tunc sit in campis sev in orreis, ipsis cedet. Quicunque autem partis residue de annona iuxta ordinacionem meam vel vxoris mee receptor extiterit, tenebitur eis vnum talentum denariorum pro vtensilibus ad Curiam pertinentibus exhibere, quod si facere recusauerit, omnem annonam integraliter, siue sit in campis sev in orreis, sibi licite uendicabunt. Si uero post messem, antequam semen frugum terre mandatum fuerit, nos mori contigerit et forte ipsa annona collecta sit uendita vel alio modo consumpta, ille, quem rerum nostrarum in Curia repertarum successorem statuerimus, tenebitur ipsis seruicium eiusdem anni et eciam semina pro Curia necessaria et vnum talentum denariorum pro rebus aliis ad Curiam spectantibus exhibere. Et ne in posterum nobis decedentibus heredes nostri vel consanguinei vel affines aliquid ius, siue sit lantsidelreht sev erbreht, vel eciam in structuris ibi factis sibi vendicare debeant uel ualeant in Curia supradicta, presentem litteram scribi feci et sigillis quatuor Ministerialium videlicet domini Vlrici de Capella judicis prouincialis super anesum et domini Heinrici de Volchenstorf et domini Chunradi de Capella et domini Heinrici de Trvna eo, quod proprio sigillo caream, roborari testibus annotatis, Qui sunt Dominus Otto wolfstain, Dominus Otto der Fransen, Ditmarus holzer, Heinricus de Wuldenstorf, Vlricus Camerarius, Vlricus et Chunradus dicti Ceseres, Vlricus de Nenzing, Hertnidus Cesar, Ditmarus Wolfstain, Heinricus tobler, Herwordus de Chremsdorf, Ditricus Latinus et plures alii, qui eidem facto inferfuerunt, audiuerunt pariter et uiderunt. Acta sunt hec Anno domini Millesimo CC°.LXXXVII°. Quinta decima Kalendas Jvnii in Domo sancti Floriani.

Source Fulltext: OÖUB 4 (Wien 1867) S. 59-60, Nr. 66