Qvia facta mortalium a mencium recordacione per lapsum temporis sepe sepius excidunt et labuntur, Necesse est, vt singuli contractus litterarum testimonio perhennentur. Proinde ego Leupoldus de Engelpoltsdorf scire cupio vniuersos presencium inspectores, quod dominus Vlricus venerabilis prepositus, Einwicus decanus Totusque Conuentus domus sancti Floriani contulerunt michi et vxori mee domine Gertrudi pro iure personali Curiam suam in Potendorf ad censum xii. solidorum annuo persoluendum sub condicione talis promissi, quod si eundem censum ante festum sancti Michahelis soluere neglexerimus, in ipso die sancti Michahelis xii. solidos superaddamus censui pro emenda. Et si tunc illa tria talenta ante festum sancti Michahelis sequentis anni vna cum censu eiusdem anni iterum non persoluerimus, ipso die sancti Michahelis emenda xii. solidorum denuo supercrescet sicque abnoxii erimus ad solucionem sex talentorum. Illis etiam ante festum sancti Michahelis anni tercii non solutis ab omni iure nostro, quod in ipsa curia nobis conpetit, videbimur penitus corruisse. Vnde cum sepe dicta curia amplius quam xii. solidos annuatim soluere videatur, pro reconpensacione residuorum prouentuum tradidi memorate ecclesie de bona voluntate fratris mei Dietmari et vxoris mee tria predia, que michi in sorte patrimonii cesserant, vnum videlicet in weichselpaum, secundum in Chulm iuxta Charlsperg, tertium in der weytra proprietatis tytulo perpetuo possidenda. Me autem et vxore mea domina Gertrude viam vniuerse carnis ingressis eadem Curia ad Ecclesiam prefatam libere reuertetur heredibus meis uel etiam fratri meo Dietmaro suisque heredibus nullo iure in curia uel etiam in prescriptis prediis conpetente. Et ut omnia de solucione census premissa, nisi forte legitimum interueniat inpedimentum videlicet generalis terre per grandinem uel principum discordiam deuastatio, inconuulsa seruentur penitus et illesa, heredes quoque mei seu frater meus et sui heredes nec in Curia nec in prediis a me sibi collatis aliquod ius sibi ualeant vendicare, presentem litteram inde feci conscribi et sigilli domini Ottonis de zelking capitanei libere Ciuitatis eo, quod proprio sigillo caream, munimine roborari Testibus subnotatis, qui sunt dominus Hainricus de Eud, dominus Walchunus de Swainpach, dominus Hainricus Lauffner, dominus Otto Wolfstain, Hainricus et Reicherus de Husendorf, Dietmarus Wolfstain, Hainricus Tobler, Hainricus et Hermannus Ridler, Dietricus Walich, Herwordus de Chremstorf et plures alii, qui eidem facto interfuerunt, audiuerunt pariter et viderunt. Datum anno domini M°.CC°.LXXXVIII. in die Petri et Pauli.

Source Fulltext: OÖUB 4 (Wien 1867) S. 92-93, Nr. 94