Nos Rugerus de Ottersteten et Ditmarus de Aistershaim Scire uolumus uniuersos presentem paginam inspecturos, quod matertera nostra pie memorie Domina Elyzabeth vxor Rugeri de hu^etten agens in extremis pro remedio anime sue legauit Ecclesie sancti Floriani, vbi sepulturam uivens elegerat, duo predia, vnum in spech, alterum in reichgozzing de bona uolunlate nostra pariter et consensu renunciantibus nobis tempore sepulture eiusdem et pro nobis et pro cunctis heredibus nostris omnibus iuribus, que ex successione hereditaria in eisdem prediis nobis conpetere uidebantur. Verum cum eadem predia annuatim duo talenta et amplius soluere uideantur, statuimus vnacum prefato Huttario eiusdem domine Elyzabeth relicto, vt magister Infirmorum, quem eorundem prediorum prouisorem esse volumus, x. solidos in anniuersario matertere nostre diuidat annis singulis inter fratres, vt uidelicet ipsum anniuersarium cum missis et uigiliis eo ritu peragant, quo anniuersarium sacerdotis de loco agere consueuerunt. Residuum vero seruicii rector infirmorum magistro operis tanto tempore exhibebit, donec fabrica monasterii plene fuerit consummata. Facta autem consummatione illud residuum super x. solidos in elemosinas pauperum in ipso anniuersario idem infirmarius tenebitur erogare. Hec igitur ordinatio nostra si per negligentiam non obstante aliquo legitimo inpedimento fuerit pretermissa nec post trinam ammonicionem nostram uel heredum nostrorum fuerit emendata, seniores duo ex heredibus nostris nobis non existentibus de eisdem prediis tanto se tempore intromittent, donec ea, que neglecta sunt, fuerint reuocata. Facta quoque reuocacione heredes nostri, qui se de ipsis prediis intromiserant, nichil ulterius habebunt disponere cum eisdem. Quodsi forte ad restitucionem eorundem se difficiles redderent prediorum, super rehabicione ipsorum aduocati sui auxilium inuocare protinus tenebuntur. Et ne prefata ecclesia super huiusmodi testamento a nobis uel a nostris successoribus calumpniam aliquam in posterum paciatur, presentem litteram cum appensione sigillorum nostrorum et sigilli Rvgeri de hv^etten, qui eadem predia tenere pro suo tempore debuisset, dedimus Ecclesie memorate Testibus annotatis, qui sunt Dominus Heinricus de Volchenstorf, Dominus Heinricus de Lonstorf et frater suus dominus Otto, de harthaim, Dominus ditricus de Ebelsperch, Dominus Otto Wolfstain, Sifridus de Woelchling, Heinricus de dietreiching, Otto de V^ezing, Hierzo, Hainricus liber, Heinricus Tobler, Ditricus Walich, Herwordus de chremstorf et plures alii, qui eidem facto interfuerunt, audierunt pariter et uiderunt. Acta sunt hec Anno domini M°.CC°.LXXX°.VIII°.VII Idus Junii.

Source Fulltext: OÖUB 4 (Wien 1867) S. 89-90, Nr. 92