Ich Weichart hern Weicharts svn von Polnhaim tu^en chunt mit disem prief allen, di in hornt lesen, daz probst Vlrich vnd allev samnvng von sant Florians haus habent geliehen Vlrichen vnd Alram von Piriching vnd ir chinden ze rechtem lehen den zehent auf dem Wernhartshof daz Ruzeldorf vnd da selben auf einem lehen vnd den zehent auf einer hu^eb datz perge vnd einen tail des zehentes auf dem hof datz prvnne, den si gechauft heten von Hainreichen chlainstain, der in ê ze lehen het von dem gotshaus, vnd ist daz geschehen mit sottam (sic) gelub, daz si ierchleichen von dem selben zehenten suln geben ze zins zehen phenning an sant Jorigen tag, vnd tu^ent si des njcht, so shuln si in den nechsten vierzehen tagen nach sant Jorigen tag sehzk phenning ze wandel geben; geben si danne der sibenzk phenning nicht, so sol sich der probst mit ier gueten willen des selben zehents vnderwinden so lang, vntz datz si di selben phenning geben, vnd suln auch den selben zins nindert nu^er in den hof daz perge antwu^erten. si shuln auch desselben zehent nindert verchumbern weder mit satzvng noch mit hingeben, nu^er mit des probst gu^eten willen. Wand di selben chnecht mein diner sint vnd selben nicht insigel habent, daz vu^erpaz chain chrieg zwissen in werd vmb den selben zehenten, han ich dem probst vnd der samnung gegeben disen prief mit meinem insigel vnd sint des gezevg her chunrad von volchensdorf, her Otte Wolfstain, Ditmar Wolfstain, Heinreich tobler, Ditreich Walich, Herbord von Chremsdorf vnd alle di, di da pei sint gewesen, Vnd ist daz geschehen nach vnsers herren gepu^erd vber tausent Jar vnd zwaihundert jar am dem Echt vnd ochzikstem jar an sand vrbans tag.

Source Fulltext: OÖUB 4 (Wien 1867) S. 88-89, Nr. 91