Ich otte von Pernekker tv°n chvnt mit disem prief allen, di in an sechent oder horent lesen, daz ich hern Levtolden von Wald han avf gegeben ein hof vnd ein Mol datz Larich, di er vor von mir het ze rechtem Lechen, also daz er mit mier vnd mit meinen erben furbaz nicht ze schaffen sol haben vnd ist daz geschehen mit meiner svn Otten vnd Gvndachers, di da pei waren, gv^eten willen vnd ovch mit sampt mier im habent gelobt, daz si sein gewern schvlen sein, swo im sein dv^erft geschiecht. Daz des icht vergezzen werd oder daz dehain chrieg zwischen mir vnd im dar vmb werd, so gib ich im disen prief mit meinem insigel vnd gib im dar zv° di gezivg, di hie geschriben sint: Hainrichen von Volchensdorf, hern Otten wolfstain, Albrechten von Havtzenpach, Ditmar posach, Albrechten den wolfstain, wilhalm von Chersperch Ditrichen walich Heinrichen den Tobler vnd alle, di da pei sint gewesen vnd gesehen vnd geho^ert habent, vnd ist daz geschechen nach vnsers hern gebv°rd vber tavsent iar vnd zwai hvndert iar, an dem Nevnzigisten iar an sand barnabas tag.

Source Fulltext: OÖUB 4 (Wien 1867) S. 132-133, Nr. 139