Wand ein isleich mensche an seinen lesten zeiten lon enpheht nach seinen werchen, si sein gut oder po^ese, So ist des durft, daz wier iz hie also shaffen, daz wier dort got gevallen. Da von so tv^en ich Gundacher von storchenberch chvnt mit disem brief allen, die in ansehent oder horent lesen, si seint nv lemptig oder si wern noch geborn, daz ich dem chloster datz sant florians havs han gegeben ze rehter aigenshepht mein mvl datz winchlarn pei der ypphe durch got vnd durch meins svns lieb, der da sich ergeben hat, vnd ist daz geschehen mit aller meiner chinde gvten willen. Ich han iz aver getan mit sogetaner beshaidencheit, daz man von derselben mvl alle iar an meiner havsvrowen vro Ofmein iar tag shol ein pfvnt pfenninge vnder di herren tailen, daz si ir mit Messen vnd mit vigilin gedenchen, als si von reht shvllen. Swaz si dar vber pfenninge dinet, di shol mein svn Gvndacher nemen, di weil er wil, daz er dar vmbe pv^ech chavf vnd swes er anders bedarf. Swaz aver chlaines dinstes avf der mvl ist, daz sol der nemen vu^er sein mv^e, der derselben mvl phleger ist. Swenne aver mein svn den selben nvzze niht vurbaz wil enphahen oder swenne er niht ist, so sol aller der nvzze, der avf der selben mvl ist, an daz pfvnt, daz man vnder di herren tailen shol, angeho^eren di gemaine, daz man in ier pfrv^ent desterpaz geben mv^ege. Daz daz stete beleib vnd daz si dehain ansprach vu^erpaz haben von mir oder von minen erben, da von gib ich in disen brief mit meinern insigel vnd mit meines svns weicharts insigel vnd gib in des gezevg, di hie geshriben sind: Her Chunrut der chappelan, Ru^epreht der rihter, Sein pruder Dietmar von chv°nzinge, Vlreich der rihter von sant Lienhart, Ott der rihter, Liebhart der tu°mvoit, Wernhart der o^eder, Fridreich der reuter, Sweiker von sulz, Wolfhart von zigelhouen, Go^ezze vnd ander leute genvg, di da pei waren. Vnd ist daz geshehen nach vnsers herren purt vber tausent iar vnd zwai hvndert iar, an dem zwai vnd nevnzkisten iar an sant Oswalts tag.

Source Fulltext: OÖUB 4 (Wien 1867) S. 170-171, Nr. 185