Ich Marichart von Tvrsendorf tv^en chvnt allen levten, di disen prief sehent oder horent lesen, daz ich mit gvtem willen aller meiner erben han ze wechsil gegeben dem erwern herren Propst Ainweigen vnd seiner Samnvng datz sand Florian ein Hvb meins aigens, daz ich het in der Biedmarich datz Dvrringperig sechs schilling gvlt vmb ir aigen, daz si hetin in Osterreich datz Gotzeinstorf also, daz ich daz selb aigen vnd si di sechs schilling gvlt vurbaz immer mer in rehter aigensgwer schvln habn vnd daz dem vorgenanten Probst vnd der Samnvng an der vorgenanten gvlt datz Dvrrenperig d eh ein ansprach gescheeh, setz ich in ze pvrigil hern Seifrit den lochler vnd Havgen von wograin, di mit ir gv^etem willen habnt gelobt, daz st mit sand mir in schvln di selben gvlt vurantwurten gegen aller ansprach noch lantsreht on allen iren schaden. Swaz aver si schaden an der selben gvlt von dehainer ansprach enphahent, den schvln si avf mir habn vnd avf den vorgenanten purigiln vnd avf allem, daz wir in dem lant habn. Daz diser bechsil vnd disiv red stet vnd vnzebrochen beleib, gib ich dem vorgenanten probst vnd der Samnvng disen prief versigelt mit meinem insigel vnt mit meiner vetern insigel hern Ditmars vnd hern vlreichs von Tvrsendorf. Des sind gezevg, di hie geschriben sind, daz ist her Hainreich von volcheinsdorf, her Chvnrat von Chappelle, her Chvnrat von volcheinstorf, her Chvnrat von Arnstain, zwen Prevheven der alt her Hainreich vnd der jvng her Hainreich, zwen Retlperger der Friedreich vnd der Gvndacher her Meinhalm der riehter datz sand polten vnd ander vrom levt, di da pei sind gewesen. Diser prief ist gegeben, dv van christes pv^erd waren Tavsent iar, zwai hvndert iar, acht vnd nevntzig iar datz sand Polten an der hailigen tach sand Fabian vnd sand Sebastian.

Source Fulltext: OÖUB 4 (Wien 1867) S. 273-274, Nr. 297