Ich Hainreich von Wallsee, Lantrichter ze Waechsenberch tun chunt allen leuten, die disen brief ansehent oder ho^ernt lesen, daz her ainweich der probst datz sand florians haus het so long gechlagt hintz Dietreichen von Entzeinsdorf vmb den hof, der haizzet Pfaffenhoven vnd leit bey dem Marcht datz sand Peter also, daz er nu^e seinen zins versezzen hiet manich iar, vntzt daz er iem den selben hof mit Recht hiet wol an gewunnen, dez chom derselb Dietreich mit seinen frainten zu dem vorgenanten Probst vnd pat in, daz er in der ansprach begab, er wolt iem daz geluben, swo er iem fürbaz seinen zins ein halb phunt phenning newer wienner an vnser vrawen tag in dem heribst nicht ga^eb, daz iem dann der hof ledig scholt sein, vnd scholt weder er noch dhainer seiner erben fürbaz darzu dhain recht haben. Dez gewert in der Probst vnd lie in von der ansprach, also daz er iem daz selb gelobt hat, swa er den zins fürbaz versitzzet an vnser vrawen tag in dem heribst, daz der hof schol dem Gotshaus ledig sein. Vnd wann er selb nicht jnsigel hat, do pat mich der probst von demselben Chloster vnd auch er dietreich, daz ich an disen brief zu einer gezeugnüzze lait mein jnsigil. Darzu hat auch Chvnrat von Chappelle sein jnsigel dar an gelait. Dar zu sind auch geschriben die zeug, daz ist Dietreich der Piber, her Leutold von Wald, her Ott vnd her Dietmar die Wolfstain, Albrecht vnd Fridreich vnd Dietmar die Wolfstain, Wolfhart von Hautzenberg, Vlreich von Piriching, Herwort der Chremstorffer, Fridreich der Swainpekch, Chalhoch von zirknaren, Ortolf der Graf, Hainreich der Swainpekch. Ditz ist geschehen nach vnsers herren purd vber tausent iar vnd dreu hundert iar an sand Chungunten abent.

Source Fulltext: OÖUB 4 (Wien 1867) S. 332-333, Nr. 357