Ich Ortolf der Aspech vnd mein hovsvrowe vrow Ofmey tvn chvnt an disem prif allen levten, di in horent lesen, daz wir mit aller vnser erwen gv^eten willen herrn Aynwigen dem probst datz sand florians hovs vnd aller seiner samnvng haben gesezt vnsern hof datz Tenne, da wir avf sitzen, vmb hvndert phvnt phenning wiener mv^enz und ist daz geschehen mit sogetanem gelv^ebd, di weile wir vnd vnser erwen dem selben gotzhovs di vorgenanten phenning an sand Merteinstag nicht wider geben, so scholl der probst vnd di samnvng den selben hof haben in rechter aigens gwer vnd ze einem vrchv^ent der selben aigenschaft schv^el wier vnd vnser erwen demselben gotzhovs allev iar an sand Merteins tag geben ze einem eins ein phvnt phenning niwer wienner. Swo wier denselben tag versavmten, so schvllen driv wandel in drin virtzechen tagen nach sand Merteins tag avf den eins gen also, daz wir immer vber virtzechen tag setzk phenning ze wandel schvllen geben vnd swo wier diselben wandel nicht geben nach den sechs wochen, so schvl wier siv immer vber virtzechen tag mit zwispil geben also, daz div wandel immer mer auf sich nemen schvlen vntz hin vmb an sand Merteins tag vnd swo wir danne ê vor sand Merteins tag des eins vnd avch der wandel nicht abe chomen, so schol sich der probst zv dem hof ziechen mit vnserm gv^eten willen vnd schol seinen vrvm da mit schaffen mit stiftvng vnd mit sto^ervng vnd mit alles nvtzes gwer, so im aller best gevellt. vnd daz ditz dinch stet beleib vnd an chrieg, so geb wier im vnd demselben gotzhovs disen prif versigelten mit hern Eberharts insigel von walse, der lantrichter ob der ens ist, vnd mit hern Otten von Chrevzen vnd hern Heinrichs von volkenstorf insigeln, in der gericht der selb hof leit, wand wir selben nicht aigens insigels haben, mit den zivgen, di hie geschriben sint, daz ist der selb her Eberhart von walse vnd her Ott vnd her Heinrich von volkenstorf, her Levtolt von wald, her Ott von wolfstein, her Ditmar der wolfstein, her Ortolf der Chersperger, Heinrich der Jacober, Albrecht der wolfstein, Hertel von prvk, Herbort der Chremstorfer, Meinhard vnd vlrich di Sintzenberger, willig der aspech, Fridrich der Swainpech, Chalhoh von Cirtnaren, Heinrich der Hirtel, Chvnrat von pircharen (?) vnd ander frvm levt, den iz chvnt wirt getan. Ditz dinch ist geschehen nach vnsers herren prv^ed vber Tavsent iar vnd drivhvndert iar dar nach in dem nechsten iar an sand Georen tag.

Source Fulltext: OÖUB 4 (Wien 1867) S. 388-389, Nr. 419