Ich Chunrat von Chappel tun chunt mit disem brief allen la^euten, di in ho^erent lesen, daz Chunrat der Chaiser von Aeisental mein diener hat aufgegeben vor mir seinem aydem Wernharten von Ludweigstorf einen hof datz Heresing in dem dorff vnd hat daz getan mit sogetaner gelub, ob got sein Tochter hin na^em von diser werlt ê daz si erben gewunne vnd daz die sturben, so schol ir wiert Wernhart denselben hof inne haben vntzt an seinen tod also, daz er in nindert verchummren sol weder mit verchauffen noch mit setzen. Vnd swenne er dann nicht mer ist, so schol der selb hof Chunratz chind wider an erben vnd ist daz alles geschen vor mir vnd mit meinem guten willen vnd daz dez furbatz icht vergessen werd oder daz zwischen in dar vmb dhain chrieg werd, dar vmb so gib ich in disen brief versigilten mit meinem Insigel vnd ze pezzer bedenchnusse hat mein O^ehaim her hainreich von volkenstorf sein Insigel auch dar an gehangen vnd dez sint gezeug her Aespin von hag, her Reicher von perchaim, her Vlreich der Chamrer, her Hainreich sein Sun, her Meinhart Chlingenprunne, her hartneyd der Chaiser vnd Vlreich sein pruder, fridreich Schickche, Vlreich vnd hartneyd von Nentzing, Ott von Nentzing, Ott Ridler, fridreich ob dem weyer, Waltchun von U°tzing vnd darzu alle, den ez chunt wirt getan, datz dinch ist geschehen, do von vnsers herren gepurd waren vergangen Tausent iar vnd dreu hundert dar nach in dem nachsten iar an sand Clementen tag.

Source Fulltext: OÖUB 4 (Wien 1867) S. 381, Nr. 413